Tájirıbeli júrgizýshi: 4 ul, kóp aǵash ósirdim, endigi armanym — úı salý
ASTANA. KAZINFORM - Jumysshy mamandyqtar jyly aıasynda el damýyna adal qyzmetimen úles qosyp júrgen eńbek adamdarynyń qoǵamdaǵy mártebesine erekshe nazar aýdarylyp jatyr. Óz kásibine adal osyndaı keıipkerlerdiń biri — QR Prezıdenti Іs basqarmasynyń Materıaldyq-tehnıkalyq qamtamasyz etý basqarmasynyń «Avtosharýashylyǵy» ujymynyń altynshy razrıadty kólik júrgizýshisi Qanat Beldeýbaev.
Qanat Beldeýbaevtyń qyzmettik avtobýspen áriptesterin tasyp júrgenine 20 jyldan asty. Bir qaraǵanda asa aýyr kórinbese de, qyzmetkerlerdi úıden jumysqa jáne keri jetkizý, resmı delegatsııa ókilderin alyp júrý kólik tizgindegen keıipkerimizge zor jaýapkershilik júkteıdi.
Jyldar boıy birge jumys istegen áriptesteri Qanat myrzany:
— Shveıtsarııalyq saǵat sekildi senimdi. Sózi az, qashan da qol ushyn sozýǵa daıyn,- dep baǵalap jatady.
Eńbek adamynyń tehnıkaǵa degen qumarlyǵy bala kezden bastalǵan. Aqmola oblysynda dúnıege kelgen Qanat Beldeýbaev ákesimen birge kólik jóndeý isine atsalysyp, jastaıynan keńshardyń traktory men kombaınyn tizgindegen. Sol sebepti de, kólik júrgizýshi mamandyǵyn tańdaýy kezdeısoq emes, bul mamandyq onyń ómirlik isine aınaldy.
2004 jyly 24 jasynda ol QR Parlamenti Sharýashylyq basqarmasynyń avtokólik sharýashylyǵyna júrgizýshi bolyp jumysqa ornalasty. Odan beri jıyrma jyldan astam ýaqyt ótti, kóp nárse ózgerdi, jasqa jas qosyldy, kásibı dáreje artty, tek Qanat Beldeýbaevtyń eńbekqorlyǵy men jaýapkershiligi ǵana ózgergen joq.
Qanat myrza kún saıyn tańǵy beste turyp, jer-jerden qyzmetkerlerdi jınap, jumysqa jetkizse, qas qaraıǵan shaqta áriptesterin aman esen shańyraǵyna jetkizedi. Ol kúndelikti jumystan bólek, resmı delegatsııalardy qarsy alý jáne basqa da qyzmettik tapsyrmalardy asqan jaýapkershilikpen ári tııanaqty oryndaıdy.
Qanat Beldeýbaev óz isiniń sheberi ǵana emes, sonymen birge jas áriptesterine úlgili maman, jol kórseter senimdi serik. Jumystaǵy jyldar boıǵy qajyrly eńbegi úshin ol áriptester arasynda syıly jáne basshylyqtyń zor qurmetine ıe.
— Ár er adam aǵash otyrǵyzyp, ul ósirip, úı salýy kerek. Meniń tórt ulym bar, osy ýaqytqa deıin az aǵash otyrǵyzǵan joqpyn. Endigi maqsatym úı salý, bul meniń ómirimniń kelesi kezeńi bolady, – deıdi eńbek adamy.
Qanat myrza týǵan aýylyn qansha saǵynsa da, astanada balalarynyń jaqsy bilim alýyna, ári qaraı damýyna múmkindik kóbirek ekenin túsinedi.
— Uldarym er jetip, óz joldaryn tapqan soń, men de armandarymdy júzege asyramyn. Al ázirge jumysymdy jalǵastyra beremin, – deıdi ol.
Qanat Beldeýbaevtyń ómir joly óz isine adaldyqtyń, kópke qyzmet etýdiń jarqyn mysaly. Jumysshy mamandyqtar jyly osyndaı eńbek adamdarynyń mereıin asyrý barshamyzdyń ortaq mindetimiz.