Tájikstannyń joǵary oqý oryndary qazaqstandyqtar úshin 100 grant bóldi

ASTANA. KAZINFORM – Bul týraly «Halyqaralyq baǵdarlamalar ortalyǵy» AQ baspasóz qyzmeti habarlady.

Ortalyq taratqan málimetterge qaraǵanda, Qazaqstan Respýblıkasynyń Úkimeti men Tájikstan Respýblıkasynyń Úkimeti arasyndaǵy 2000 jylǵy 13 maýsymdaǵy Bilim berý salasyndaǵy ynytymaqtastyq týraly kelisim sheńberinde Tájikstan Respýblıkasynyń joǵary oqý oryndarynda oqý úshin 2025-2026 oqý jylyna myna baǵdarlamalar boıynsha grant usynyldy:

bakalavrıat – 70 oryn;

magıstratýra – 20 oryn;

úzdiksiz ıntegratsııalanǵan medıtsınalyq bilim berý baǵdarlamasy – 10 oryn.

Oqý tili – tájik/orys tili.

Joǵary oqý oryndary men mamandyqtardyń tizimin myna jerden kóre alasyzdar.

Grant kelesi shyǵyndardy qamtıdy:

tegin oqý;

memlekettiń ulttyq zańnamasyna sáıkes aı saıyn stıpendııa;

medıtsınalyq qyzmet kórsetý.

-Eskertý! Qalǵan shyǵyndy, onyń ishinde kólik jáne turý shyǵyndaryn grant ıegeri óz qarajaty esebinen tóleıdi.

Qujattyń tolyq paketi 2025 jylǵy 10 shildeden 5 tamyzǵa deıin qabyldanady.

Bilim berý salasyndaǵy kelisimder sheńberinde shetelde oqýǵa úmitkerlerdi irikteý derbes áńgimelesý jolymen júzege asyrylady.

Halyqaralyq sharttar sheńberinde shetelde oqýǵa úmitkerlerdi irikteý kezinde jetim balalar men ata-anasynyń qamqorlyǵynsyz qalǵan balalar; bala kezinen múgedekter men múgedek balalar; kópbalaly otbasynan shyqqan balalar; aýyldyq eldi mekenderde sońǵy 2 (eki) jyl turatyn úmitkerler; sheteldik joǵary oqý oryndarynan shaqyrýy bar úmitkerler basymdyqqa ıe.

Qorytyndy irikteýdi qabyldaýshy tarap ótkizedi.

Osyǵan deıin Qazaqstanda kásiptik bilim berý uıymdarynyń aqparattyq kartasy jasalyp jatqany týraly jazdyq.