Tájikstannyń toǵyz termınaly BUU-nyń ESKATO qurǵaq port jelisine engiziledi

ASTANA. KAZINFORM – Tájikstan Respýblıkasynyń Kólik mınıstrligi ESKATO jumys tobynyń otyrysynda halyqaralyq mańyzy bar qurǵaq port jelisine qosýǵa eldiń toǵyz kólik termınaly men logıstıkalyq ortalyǵyn usyndy, dep habarlaıdy Kazinform menshikti tilshisi.

Tájikstan Kólik mınıstrliginiń málimetinshe, «qurǵaq porttar» mártebesin alý úshin Dýshanbe, Týrsýnzade, Horog jáne Mýrgab qalalaryndaǵy logıstıkalyq ortalyqtar, sondaı-aq «Tómengi Pıandj», «Kýlma», «Gýlıston», «Lahsh» jáne «Bobodjon Gafýrov» shekara termınaldary usynyldy. Bul nysandar standarttarǵa sáıkestendirilgennen keıin halyqaralyq tizimge engiziledi.

- ESKATO-nyń qurǵaq port jelisine qosylý bul logıstıkalyq ortalyqtar men termınaldardy resmı kartalarda jáne BUU derekqorlarynda kórsetýge múmkindik beredi, bul halyqaralyq yntymaqtastyqty nyǵaıtýǵa, Tájikstannyń tranzıttik áleýetin damytýǵa jáne ulttyq kólik jáne logıstıkalyq ınfraqurylymǵa ınvestıtsııa tartýǵa qosymsha múmkindikter jasaıdy, - dep habarlady Kólik mınıstrligi.

Úkimetaralyq kelisimge 2013 jyldyń 1 mamyrynda Bangkok qalasynda qol qoıylyp, ol 2016 jyldyń 23 sáýirinde kúshine endi. Kelisimge qatysýshylar arasynda BUU Azııa jáne Tynyq muhıty úshin ekonomıkalyq jáne áleýmettik komıssııasynyń (ESKATO) múshesi bolyp tabylatyn 17 el, sonyń ishinde Ázerbaıjan, Úndistan, Qazaqstan, Qytaı, Reseı, Tájikstan, Túrikmenstan, Ózbekstan jáne Ońtústik Koreıa bar.

Osyǵan deıin Tájikstan 2037 jylǵa qaraı tolyǵymen «jasyl» elge aınalýdy josparlap otyrǵany týraly habarladyq.