Tájikstannyń memlekettik qaryzy 3,4 mlrd dollarǵa jetti

DÝShANBE. KAZINFORM – Tájikstan úkimeti syrtqy qaryzdardy óteý úshin bıyl 380 mln dollarǵa jýyq qarajat baǵyttamaq, dep habarlaıdy Kazinform agenttiginiń tilshisi.

Tájikstannyń Qarjy mınıstri Faızıddın Kahhorzodanyń málimetinshe, 3,4 mlrd dollar bolatyn memlekettik qaryz jalpy ishki ónimniń 25,2% teń.

Qaryzdyń 89% halyqaralyq qarjy uıymdaryna tıesili bolsa, qalǵan 382 mln dollar ishki qarjy kózderinen alynǵan aqsha.

Byltyr olardy óteýge Tájikstan úkimeti 299,2 mln dollar baǵyttaǵan. Onyń ishinde 204,3 mln dollar negizgi qaryzǵa jumsalsa, 94,9 mln dollar paıyzdyq ústemeni japqan.

Resmı Dýshanbeniń basty kredıtory – Qytaı. Bul eldiń aldyndaǵy qaryz shamamen 1 mlrd dollarǵa jýyqtaıdy. Sonymen qatar, Dúnıejúzilik bank ($370 mln), Azııa damý banki ($260 mln), Islam damý banki ($212 mln), Eýropalyq qaıta qurý jáne damý bankterinen ($167 mln) alynǵan nesıeler bar.

Bıyl Tájikstan qaryzdardy óteý úshin 4,15 mlrd somonı (shamamen $380 mln) bóledi. Bul bıýdjet shyǵystarynyń 8,1 paıyzyna teń.

Aıta keteıik, byltyr Tájikstannyń jalpy ishki ónimi 8,4%-ǵa ósti. Ekonomıkalyq damý jáne saýda mınıstri Zavkızoda Zavkı Amınniń aıtýynsha, geosaıası jaǵdaılarǵa qaramastan, eldiń makroekonomıkalyq damý turaqty.

- Memlekettik strategııalar men baǵdarlamalardy júzege asyrý makroekonomıkalyq kórsetkishterdi turaqty ustap turýǵa yqpal etti. 2024 jyldyń qorytyndysy boıynsha eldiń jalpy ishki ónim kólemi 8,4%-ǵa ósip, 153,4 mlrd somonıge jetti (shamamen $14,1 mlrd). Bul rette ınflıatsııa turaqty deńgeıde, ıaǵnı 3,6% shamasynda qaldy, - dedi mınıstr BAQ ókilderiniń qatysýymen ótken baspasóz máslıhatynda.

Qosa ketsek, byltyr Tájikstanda jemqor sheneýnikter memleketke 40 mln dollarǵa jýyq shyǵyn keltirdi.

Sondaı-aq, Tájikstan úkimeti ýtılalym mólsherin ózgertýdi josparlap otyr.