Tájikstannyń ardagerleri qazaqstandyq ınternatsıonalıst-jaýyngerlerdi quttyqtady
ASTANA. KAZINFORM — Tájikstannyń ardagerleri qazaqstandyq ınternatsıonalıst-jaýyngerlerdi Keńes áskerleriniń Aýǵanstan jerinen shyǵarylǵan kúnimen quttyqtady. Tájikstan Respýblıkasy ardagerler qaýymdastyǵynyń múshesi ıAkýb Haıdarov Kazinform tilshisine suhbat berip, olardyń bir-birine baýyrmaldyǵy týraly aıtyp, estelikterimen bólisti.
— Aýǵanstanǵa attanar aldynda Dýshanbe, Kýlıab, Qorǵantóbede oqý-jattyǵý bazalary bolǵan. Munda tájikter, qazaqtar, ózbekter, orystar jáne basqa da kóp ulttyń jigitteri keldi. Biraq biz ultqa bólinbedik, biz ortaq ınternatsıonaldyq paryzymyzdy oryndadyq, — dedi ardager.
Ol bul kún qaza bolǵan dostaryn eske alyp, qazirgi ýaqytta TMD elderinde jáne odan tys jerlerde turatyn qarýlastarymen turaqty baılanysta bolǵan Aýǵan soǵysy ardagerleri úshin erekshe kún ekenin atap ótti.
— Urpaqtar arasyndaǵy baılanysty saqtap, jastarǵa otansúıgishtik, qyzmet jáne paryz týraly shyndyqty jetkizý mańyzdy. Búgin men barsha qazaqstandyq ınternatsıonalıst ardagerlerdi shyn júrekten quttyqtaǵym keledi. Sizderge jáne sizdiń otbasylaryńyzǵa baqyt, densaýlyq jáne bar jaqsylyqty tileımin, — dedi ıAkýb Haıdarov.
1979-1989 jyldar aralyǵynda ınternatsıonalıstik boryshyn óteý úshin Qazaqstannan Aýǵanstanǵa 22 269 jaýynger jiberildi. Sol soǵystan 926 qazaqstandyq oralmady. Qazir elimizde 15 myńǵa jýyq ınternatsıonalıst-jaýynger bar.
Aýǵan soǵysynyń ardagerleri «Erlik sabaqtaryna», áskerge shaqyrylǵandardy shyǵaryp salý rásimderine, eske alý mıtıngilerine jáne dóńgelek ústelderge belsendi túrde qatysady. Sondaı-aq olar patrıottyq sharalar, konferentsııalar, ashyq esik kúnderin ótkizedi.
Aıta keteıik, Astanada byltyr soǵys ardagerlerine 5 mıllıon teńgeden áleýmettik tólem berildi.