Tájikstanǵa tartylǵan sheteldik ınvestıtsııa kólemi 35 paıyzǵa ósti
ASTANA. KAZINFORM – 2025 jyly Tájikstan ekonomıkasyna tartylǵan sheteldik ınvestıtsııa kólemi 6,9 mlrd AQSh dollaryn qurady, dep habarlaıdy Kazinform agenttiginiń menshikti tilshisi.
Tájikstan Respýblıkasy Investıtsııalar jáne memlekettik múlikti basqarý jónindegi memlekettik komıtetiniń tóraǵasy Sýlton Rahımzoda eseptik baspasóz konferentsııasynda ótken jyldyń qorytyndysy boıynsha elge 6 925,3 mln dollar kóleminde sheteldik ınvestıtsııa tartylǵanyn málimdedi. Bul kórsetkish 2024 jylmen salystyrǵanda 1 798,6 mln dollarǵa, ıaǵnı 35,1 paıyzǵa artyq.
– Táýelsiz Memleketter Dostastyǵy elderinen tartylǵan ınvestıtsııa kólemi 3 031,0 mln dollardy nemese jalpy kólemniń 43,8 paıyzyn qurady. Bul 2024 jylmen salystyrǵanda 1 067,3 mln dollarǵa, ıaǵnı 54,4 paıyzǵa kóp, – dedi spıker.
Onyń aıtýynsha, alys shet memleketterden kelgen ınvestıtsııa kólemi 3 894,3 mln dollardy nemese jalpy kólemniń 56,2 paıyzyn qurady. 2024 jylmen salystyrǵanda ósim 731,3 mln dollardy nemese 23,1 paıyzdy quraǵan.
Aıta keteıik, ótken jyly Tájikstanǵa 37 myńnan astam qazaqstandyq týrıst barǵan.
