Tájikstanǵa Qazaqstannan gýmanıtarlyq kómek jetkizildi
ASTANA. KAZINFORM - Dýshanbede gýmanıtarlyq kómekti resmı tapsyrý rásimi ótti.
Qazaqstannyń Tájikstan Respýblıkasyndaǵy Tótenshe jáne ókiletti elshisi Ýálıhan Tórehanov Tájikstan Respýblıkasynyń Úkimeti janyndaǵy Memlekettik materıaldyq rezervter agenttigi dırektorynyń orynbasary Sohıbjon Zıedýlloevke 15 myń tonna mazýt sertıfıkatyn saltanatty túrde tabys etti.
Ýálıhan Tórehanov Qazaqstan Respýblıkasynyń Prezıdenti Qasym-Jomart Toqaevtyń tapsyrmasyna sáıkes Tájikstan Respýblıkasyna eldiń mańyzdy energetıkalyq nysandarynyń turaqty jumys isteýin qamtamasyz etý maqsatynda 2 mıllıard 542 mıllıon teńge (5,65 mıllıon dollar) kóleminde gýmanıtarlyq kómek kórsetý týraly sheshim qabyldanǵanyn atap ótti.
Gýmanıtarlyq júkterdi jetkizý KazAID halyqaralyq damý jónindegi Qazaqstan agenttiginiń kómegimen júzege asyryldy.
2006 jyldan beri Qazaqstan tarapynyń Tájikstanǵa aqshalaı jetkizgen gýmanıtarlyq kómeginiń jalpy kólemi 50 mıllıon dollardan asqany atalyp ótti.
