Tájikstanǵa bıyl Qazaqstannan 36 myńnan astam týrıst barǵan

ASTANA. KAZINFORM — 2026 jyldyń qańtarynan qyrkúıegine deıin Tájikstanǵa 36 400 Qazaqstan azamaty saıahattady, dep habarlaıdy Kazinform agenttiginiń Dýshanbedegi menshikti tilshisi.

Tájikstanǵa bıyl Qazaqstannan 36 myńnan astam týrıst barǵan
Foto: Mádibek Jánibekov/Kazinform

Tájikstan statıstıka agenttiginiń málimetteri boıynsha, alǵashqy toǵyz aıda elge 1,73 mıllıon sheteldik azamat kelgen. Bul byltyrǵy osy kezeńmen salystyrǵanda 206 800 adamǵa nemese 13,6%-ǵa kóp. Dúnıejúzilik týrıstik uıymnyń ádisnamasyna sáıkes, 1,73 mlnnyń 1,55 mıllıony týrıst retinde esepteledi, bul 23%-ǵa ósimdi bildiredi.

TMD elderiniń ishinde Qazaqstan týrıster sany boıynsha tórtinshi orynda tur. Qazaqstandyqtan Tájikstanǵa qydyrǵan barlyq sheteldiktiń 2,1%-yn qurap otyr. Eń kóp týrıst Ózbekstannan kelgen — 842 500 (48,8%). Reseıden 513 100 (29,7%) jáne Qyrǵyzstannan 150 400 (8,8%) adam Tájikstanǵa saıahattapty. TMD elderi týrısterdiń 90,1%-yn berip otyr.

Dostastyqtan tys elderdiń ishinde eń kóp qonaq Qytaı (49 600), Aýǵanstan (19 700), AQSh (12 800), Germanııa (8 400) jáne Iran (8 300) elderinen kelgen.

Tájikstanda 192 týrıstik agenttik jáne 225 qonaq úı jumys isteıdi. Sonyń 9-y bes juldyzdy, 31-i tórt juldyzdy. Sonymen qatar, 53 hostel men motel, 60 sanatorıı, 9 demalys úıi jáne 5 týrıstik ortalyq qonaqtardy qabyldady. Salada 4560 adam jumys isteıdi, salanyń jalpy kirisi 976,3 mıllıon somonıge jetti.

Eske sala keteıik, ótken aıdyń aıaǵynda Qazaqstan — Tájikstan Ekonomıkalyq yntymaqtastyq jónindegi úkimetaralyq komıssııasynyń 20-shy otyrysynda basqa salalar qatarynda týrızmdi de damytý bolashaǵy talqylanǵan.