Tájikstanǵa 10 aıda bir mıllıon tonnadan astam astyq eksporttaldy

ASTANA. KAZINFORM – «Azyq-túlik kelisimshart korporatsııasy» UK» AQ Qazaqstannyń astyq egetin oblystaryndaǵy elevatorlyq qýattardy seriktes elderge ónim jóneltý arqyly bosatý boıynsha sharalar qabyldap jatyr. 

Aýyl sharýashylyǵy mınıstrliginiń baspasóz qyzmetiniń habarlaýynsha, jańa ónimniń alǵashqy 20 myń tonna azyq-túlik bıdaıy Tájikstanǵa jóneltildi. Eksporttyq kelisimshart aıasynda Qazaqstannyń astyq operatory tájik satyp alýshylaryna barlyǵy 100 myń tonna ónim jetkizýdi josparlady. 

Óńir boıynsha áriptes elge astyq jetkizý QR Prezıdentiniń 2024 jylǵy tamyzdaǵy Dýshanbege resmı sapary barysynda Qazaqstan men Tájikstan Memleket basshylary qol jetkizgen ýaǵdalastyqtar sheńberinde júzege asyrylady.

Tájikstan - qazaqstandyq astyq pen unnyń dástúrli tutynýshysy. Bul elge azyq-túlik jetkizý jyl saıyn ósip keledi. 2024 jyldyń 10 aıynda Tájikstanǵa 1 mln tonnadan astam astyq eksporttaldy, bul 2023 jyldyń osy kezeńimen salystyrǵanda 11%-ǵa artyq (917,1 myń tonna).

Jańa astyq eksporty da joǵary kórsetkishti kórsetedi. Qyrkúıekten jeltoqsanǵa deıin tájik naryǵyna qazaqstandyq astyqty jetkizý kólemi ótken jyldyń osy kezeńimen salystyrǵanda 51%-ǵa artyp, 489 myń tonnany qurady.

«Azyq-túlik kelisimshart korporatsııasy» UK» AQ negizgi qyzmeti strategııalyq mindetterdi sheshýge - eldegi azyq-túlik qaýipsizdigin qamtamasyz etýge, astyq naryǵynda turaqty baǵany ustap turýǵa, sondaı-aq ósimdik sharýashylyǵy ónimderiniń eksportyn damytýǵa baǵyttalǵan.