Tájikstandyqtar qyspen qoshtasý meıramyn atap ótip jatyr
ASTANA. KAZINFORM – Tájikstanda qystyń aıaqtalyp, kóktemniń jaqyndaýyn jáne jerdi egiske daıyndaýdy bildiretin Sada merekesi atalyp ótýde, dep habarlaıdy Kazinform menshikti tilshisi.
Sada – tarıhtyń tereń qoınaýynan tamyr tartatyn eń kóne meıramdardyń biri. Ol jaryqtyń túnekke, jylýdyń sýyqqa, jaqsylyqtyń jamandyqqa ústemdik etýin beıneleıdi jáne tájik halqynyń tarıhynda aıryqsha oryn alady.
Ejelden Sada meıramynan keıin dıqandar kógaldandyrýǵa, aǵash otyrǵyzýǵa, jer men baqtardy abattandyrýǵa kirisken.
– Sada, eń aldymen, dıqandardyń merekesi jáne ol aýyl sharýashylyǵymen tyǵyz baılanysty. Qysqy qyryqkúndikte atap ótilýi qystyń jáne sýyqtyń bıligi aıaqtalyp kele jatqanyn bildiredi, al tabıǵat kóktemniń jaqyndaýyn jáne aýyl sharýashylyǵy jumystarynyń bastalýyn habarlaıdy. ıAǵnı Sada – tabıǵattyń Navrýzǵa bet burýy jáne kóktemgi egiske daıyndyq, – dep atap ótti Emomalı Rahmon Tájikstan halqyna joldaǵan quttyqtaýynda.
Meıram ataýy «júz» sanymen baılanystyrylady, ıaǵnı Navrýzǵa deıingi elý kún men elý túndi bildiredi. Al basqa bir nusqa boıynsha, Sada ataýy avestalyq «sand» sózinen shyqqan, ol «paıda bolý», «nurlaný», «kórinis tabý» maǵynasyn beredi jáne jaryq pen jylýǵa qatysty uǵymdy bildiredi.
Dýshanbe qalasynda negizgi is-shara elordanyń ortalyq saıabaǵy – Fırdavsıde ótýde. Halyqtyq serýender keń aýqymda uıymdastyrylyp, ot jaǵý, án aıtý men bı bıleý arqyly jalǵasady.
Dástúrli jármeńkede dıqandar aýyl sharýashylyǵy ónimderin, tuqymdar men kóshetterdi usynsa, qolónershiler halyqtyq kásip buıymdaryn tanystyrady.
Kóne meıram zamanaýı ómirmen úılesimdi túrde sabaqtasyp, Tájikstan tarıhy men búginin baılanystyratyn mańyzdy rýhanı kópirge aınaldy. Ol 2018 jyly memleket basshysy Emomalı Rahmonnyń bastamasymen qaıta jańǵyrtyldy.
Al 2023 jyly Sada merekesi ıÝNESKO-nyń adamzattyń materıaldyq emes mádenı murasynyń reprezentatıvtik tizimine resmı túrde engizildi.
Aıta keteıik, Tájikstanda Naýryzdyń halyqaralyq ortalyǵy qurylady.