Tájikstandyq baıqaýshy: Quryltaı saılaýynda daýys berýge barlyq jaǵdaı jasalǵan
ASTANA. KAZINFORM – Búgin Qazaqstanda Quryltaı depýtattarynyń alǵashqy saılaýy ótip jatyr. Daýys berý barysy halyqaralyq baıqaýshylardyń da baqylaýynda. Tájikstan Respýblıkasynyń Saılaý jáne referendým jónindegi ortalyq komıssııasynyń tóraǵasy Bahtıer Hýdoerzoda saılaý úderisinen alǵan áserimen bólisti.
Ol halyqaralyq baıqaýǵa qatysýǵa shaqyrǵany úshin Qazaqstan tarapyna alǵys aıtyp, bıylǵy saılaý naýqanynyń elde júrgizilgen konstıtýtsııalyq reforma aıasyndaǵy mańyzyna toqtaldy.
— Bıyl kóktemde Qazaqstanda konstıtýtsııalyq reforma júrgizildi. Ol eldiń saılaý júıesi men zań shyǵarýshy bıligine de qatysty. Bul Qazaqstanda memlekettik ınstıtýttardy damytý baǵytynda júıeli ári josparly jumys júrgizilip jatqanyn kórsetedi, — dedi Bahtıer Hýdoerzoda.
Halyqaralyq baıqaýshy daýys berýdiń uıymdastyrylýyn joǵary baǵalady. Onyń aıtýynsha, qajetti daıyndyq jumystary júrgizilip, saılaýshylarǵa saılaýdy ótkizý tártibi týraly aqparat berilgen.
— Saılaýdyń joǵary deńgeıde ótip jatqanyn kórip otyrmyz. Josparly daıyndyq júrgizilip, saılaýshylardy aqparattandyrý tolyǵymen qamtamasyz etilgen. Saılaýdy ótkizýge baılanysty barlyq másele boıynsha tıisti jumys júrgizilgen, — dedi ol.
Bahtıer Hýdoerzoda ózi barǵan saılaý ýchaskelerindegi jaǵdaı týraly da aıtyp berdi. Onyń sózinshe, ýchaskelik komıssııalar azamattardyń óz tańdaýyn kedergisiz jasaýyna barlyq qajetti jaǵdaıdy jasaǵan.
— Bizdiń baıqaýymyzsha, saılaýshylar óz ustanymyn ashyq bildirip, ózderi laıyq dep sanaıtyn partııaǵa daýys berýi úshin ýchaskelik komıssııalar barlyq jaǵdaıdy jasaǵan. Olardyń konstıtýtsııalyq quqyqtaryn júzege asyrýyna qandaı da bir kedergi keltirilip jatqanyn kórgen joqpyz, — dedi Tájikstannyń Saılaý jáne referendým jónindegi ortalyq komıssııasynyń tóraǵasy.
Ol bıylǵy saılaýdyń konstıtýtsııalyq ózgeristerden jáne zań shyǵarýshy bıliktiń jańa modeli qalyptasqannan keıin ótip jatqanyna baılanysty aıryqsha mańyzǵa ıe ekenin atap ótti.
Sóz sońynda halyqaralyq baıqaýshy Qazaqstan halqyna tolaǵaı tabys tilep, elimizdiń odan ári damyp, órkendeı berýine tilektestik bildirdi.
Aıta ketelik Grýzııadan kelgen halyqaralyq baıqaýshy alǵashqy Quryltaı saılaýynyń uıymdastyrý deńgeıin joǵary baǵalady.
