Tájikstandaǵy jer silkinisi: 29 úı men mektep zaqymdandy
ASTANA. KAZINFORM – Tájikstanda 13 sáýir kúni tańerteń bolǵan jer silkinisi 29 turǵyn úı men bir bilim berý mekemesine zaqym keltirdi, dep habarlaıdy Kazinform Avesta.tj saıtyna silteme jasap.
Seısmıkalyq oqıǵa jergilikti ýaqyt boıynsha saǵat 09:24-te tirkeldi.
Tájikstannyń Tótenshe jaǵdaılar komıtetiniń habarlaýynsha, jer silkinisiniń oshaǵy Rasht qalasynan 21 shaqyrym jerde jáne Dýshanbeden soltústik-shyǵysqa qaraı shamamen 160 shaqyrym jerde ornalasqan.
Epıtsentrdegi jer silkinisiniń kúshi Rıhter shkalasy boıynsha 5-6 ball, al Tájikstan astanasynda 3 ballǵa deıin dúmpý sezilgen.
Seısmıkalyq belsendilik saldarynan Rasht aımaǵynyń tórt aýylynda 17 turǵyn úı men bir jalpy bilim beretin mektep zardap shekti. Tájikabad aýdanynda taǵy 12 turǵyn úıge zaqym kelgen.
Aldyn ala málimet boıynsha, turǵyndar arasynda zardap shekkender joq. Oqıǵa ornynda arnaıy komıssııa jumys istep, qırandylardyń mán-jaıyn anyqtap, shyǵyndy baǵalap jatyr.