Tájikstandaǵy Rogýn sý elektr stantsııasy taǵy 30 metrge kóteriledi

Emomalı Rahmon Rogýn sý elektr stantsııasynyń qurylysy táýelsizdik kezeńindegi eń mańyzdy jetistikterdiń biri ekenin, ol qazirgi jáne bolashaq urpaqtyń ál-aýqaty úshin jaǵdaı jasaıtynyn atap ótti.

- Energetıkalyq qaýipsizdik árbir memlekettiń basty maqsattarynyń birine aınalǵan búgingi kúrdeli jaǵdaıda Rogýn sý elektr stantsııasynyń qurylysyn belgilengen merzimde aıaqtaý jáne onyń qýatyn tolyq iske qosý bizdiń elimiz úshin óte mańyzdy jáne taǵdyrsheshti mánge ıe, - dep atap ótti prezıdent.

Tájikstan prezıdenti qurylysshylarǵa adal eńbegi úshin alǵys bildirip, bógetti teńiz deńgeıinen 1155 metr bıiktikke kóterý memleket táýelsizdiginiń 35 jyldyǵyna laıyqty qurmet ekenin atap ótti.

Onyń atap ótýinshe, árbir aıaqtalǵan kezeń eldi tolyq energetıkalyq táýelsizdikke qol jetkizý jáne jasyl ekonomıkany damytý sııaqty ulttyq strategııalyq maqsatqa jaqyndatady. 

- 2027 jylǵa qaraı tolyq energetıkalyq táýelsizdikke qol jetkizý maqsatynda bógettiń bıiktigin 1185 metrge deıin jetkizip, sý qoımasyndaǵy sý deńgeıiniń keminde 1165 metrden tómen emes belgige deıin jetýin qamtamasyz etý kerek, - dep tapsyrdy Rahmon.

Rogýn sý elektr stantsııasy (SES) – Tájikstanda Rogýn qalasynyń mańyndaǵy Vahsh ózeninde salynyp jatqan sý elektr stantsııasy. Onyń qurylysy 1987 jyly bastaldy, alaıda KSRO ydyraǵannan keıin toqtatyldy. Jumys 2016 jyly qaıta bastaldy. Qazirgi ýaqytta SES-te 2018 jáne 2019 jyldary iske qosylǵan eki blok jumys isteıdi. Barlyǵy alty agregat ornatý josparlanǵan. 

Joba aıaqtalǵannan keıin bıiktigi 335 metr bolatyn SES bógeti álemdegi eń bıik bolady, al ornatylǵan qýaty 3780 MVt bolatyn stantsııa – Ortalyq Azııadaǵy eń irisi bolady.

Osyǵan deıin 2026 jyly Tájikstan aýmaǵynda salynyp jatqan Rogýn GES-i qurylysyna 1 mlrd AQSh dollaryn baǵyttaý josparlanyp otyrǵanyn jazdyq.