Tájikstandaǵy qazaqstandyqtar saılaýda daýys berip jatyr
ASTANA. KAZINFORM — Qazaqstannyń Tájikstandaǵy elshiliginde Quryltaı saılaýyna daýys berý júrip jatyr, dep habarlaıdy Kazinform agenttiginiń Dýshanbedegi menshikti tilshisi.
№ 436 ýchaskelik komıssııanyń tóraǵasy Aıdar Shalbaevtyń málimetinshe, dıplomatııalyq ókildik barlyq qajetti uıymdastyrý jumystaryn ótkizdi. Saılaý ýchaskesiniń tizimine Tájikstanda turaqty jáne ýaqytsha turatyn 111-den astam qazaqstandyq engizilgen.
Komıssııa músheleri daýys berý protsesine qatysyp, saılaýshylarǵa qajetti keńes aıtyp jatyr. Qonaqtar úshin ulttyq taǵamdardan turatyn dastarhan jaıylǵan.
Dýshanbede birneshe jyl jumys istep kele jatqan Qazaqstan azamaty Erbol Jaılaýov Kazinform agenttigine bergen suhbatynda qazirgi saılaý kezeńin jáne saıası partııalardyń qyzmetin qyzyǵýshylyqpen baqylap otyrǵanyn atap ótti.
— Maǵan saılaýdyń jańa formaty unady, kandıdattar óte qyzyqty ári jarqyn, al partııalardyń baǵdarlamalary tamasha jáne syndarly. Jańalyqqa, oń ózgeristerge degen úmit jáne balalarymnyń bolashaǵyna degen senim meni búgin kelip, azamattyq boryshymdy oryndaýǵa ıtermeledi, — dedi Erbol Jaılaýov.
Danııar Álhanov pen onyń zaıyby Tájikstanǵa týrıstik maqsatpen keldi jáne el úshin mańyzdy bul oqıǵany jiberip almaýdy sheshti.
— Men belsendi ómir saltyn ustanamyn jáne eldiń qoǵamdyq-saıası ómirine únemi qatysyp kelemin. Bul saılaý — Qazaqstannyń ınstıtýtsıonaldyq jańǵyrtylýynyń mańyzdy qadamy. Búgin men daýys berýge zaıybymmen birge keldim. Árbir qazaqstandyqtyń, qaı jerde bolsa da óz tańdaýyn jasaý múmkindigi bolýy mańyzdy dep sanaımyn, — dep atap ótti ol.
Daýys berý jergilikti ýaqyt boıynsha keshki saǵat 20:00–ge deıin jalǵasady, sodan keıin ýchaskelik komıssııa músheleri daýystardy sanaı bastaıdy.
Osyǵan deıin Londondaǵy qazaqstandyqtar qalaı daýys berip jatqanyn jazdyq.
