Tájikstandaǵy qazaqstandyqtar referendýmda belsendilik tanytyp jatyr

ASTANA. KAZINFORM – Qazaqstannyń Tájikstandaǵy elshiliginiń № 436 saılaý ýchaskesinde jańa Konstıtýtsııa jobasy boıynsha referendýmda daýys berý júrip jatyr, dep habarlaıdy Kazinform agenttiginiń Dýshanbedegi menshikti tilshisi. 

- Komıssııa daýys berýdiń ashyq jáne Qazaqstan Respýblıkasynyń zańnamasyna tolyq sáıkes ótýin qamtamasyz etý úshin barlyq qajetti uıymdastyrý jumystaryn júrgizdi. Saılaý ýchaskesiniń tizimine Tájikstan aýmaǵynda turaqty jáne ýaqytsha turatyn 113-ten astam qazaqstandyq engizilgen. Komıssııa músheleri daýys berý protsesin baqylap, saılaýshylarǵa kúni boıy qajetti konsýltatsııalyq kómek kórsetedi, - dep habarlady ýchaskelik komıssııanyń tóraǵasy Aıdar Shalbaev.

Daýys berý jergilikti ýaqyt boıynsha tańǵy saǵat 7:00-de bastalyp, keshki saǵat 20:00-ge deıin jalǵasady. Saılaýǵa kámelet jasqa tolǵan qazaqstandyqtar qatysa alady, ol úshin ózderimen birge jeke basyn kýálandyratyn qujaty bolýy tıis.

«Frıdom Bank Tájikstan» atqarýshy dırektory Qanat Djýlýmov sheteldegi qazaqstandyq azamattardyń osyndaı mańyzdy saıası protseske qatysý múmkindigin joǵary baǵalady.

- Otbasymnyń bolashaǵy, elim Qazaqstan Respýblıkasynyń bolashaǵy úshin daýys berý men úshin mańyzdy. Referendýmǵa qatysý – árbir azamat úshin azamattyq jaýapkershiliktiń kórinisi, - dep atap ótti ol.

Tájikstanda bilim alyp júrgen qazaqstandyq stýdentter saılaý ýchaskesine uıymdasqan túrde kelip, erekshe belsendilik tanytty.

- Biz, jastar, shette qalyp qoıa almaımyz, sebebi Konstıtýtsııa – Qazaqstanymyzdyń bolashaǵyn anyqtaıtyn negizgi zań. Men árbir daýys kúshti jáne gúldengen Qazaqstannyń damýyna úles qosady dep senemin, - dedi Dýshanbe medıtsınalyq ýnıversıtetiniń stýdenti Akbar Abdýjallılov.

Aıta ketelik, álemniń 40-tan astam elinde referendým ýchaskeleri jumys istep jatyr. 

Osyǵan deıin Túrkııada qazaqstandyqtar referendýmǵa qatysyp jatqanyn jazdyq. 

Memleket basshysy referendýmda daýys bergennen keıin BAQ ókilderi úshin ótkizgen brıfıngide Jańa Konstıtýtsııa jastarǵa arnalatynyn málimdedi.