Tájikstanda JI salasynda beıindi ýnıversıtet quryldy
ASTANA. KAZINFORM — Tájikstan úkimetiniń qaýlysymen Halyqaralyq týrızm jáne kásipkerlik ýnıversıteti bazasynda «Sandyq tehnologııalar jáne jasandy ıntellekt ınstıtýty» memlekettik mekemesi quryldy, dep habarlaıdy Kazinform agenttiginiń Dýshanbedegi menshikti tilshisi.
TR Prezıdentiniń baspasóz qyzmetiniń málimetinshe, mamandandyrylǵan ınstıtýttyń ashylýy BUU-nyń «Jasandy ıntellektiniń Ortalyq Azııada turaqty damý úshin jańa múmkindikter jasaýdaǵy róli» qararyn júzege asyrýǵa baǵyttalǵan.
Tájikstan Respýblıkasynda bul baǵytta tsıfrlyq ınfraqurylymdy damytý, ulttyq kadrlardy daıarlaý jáne jasandy ıntellekt salasyndaǵy ǵylymı zertteýlerdi keńeıtýdi qarastyratyn jasandy ıntellektini 2040 jylǵa deıin damytý strategııasy bekitildi.
Sondaı-aq Halyqaralyq týrızm jáne kásipkerlik ýnıversıteti janynda «Álemdik ekonomıka jáne dıplomatııa ınstıtýty» jáne «Týrızm akademııasy» quryldy.
Osyǵan deıin AQSh, QHR jáne Úndistan JI salasynda básekege qabiletti elderdiń úzdik úshtigine engenin habarladyq.
Sondaı-aq Qazaqstanda JI salasyndaǵy venchýrlyq ınvestıtsııa kólemi 5 ese ósip, $73 mln-nan asqanyn jazdyq.
