Tájikstanda jyl basynan beri 2 myń alaıaqtyq faktisi tirkeldi
ASTANA. KAZINFORM — Tájikstanda 2026 jyldyń birinshi jartyjyldyǵynda quqyq qorǵaý organdary 2 myń alaıaqtyq faktisin anyqtady, dep habarlaıdy Kazinform agenttiginiń Dýshanbedegi menshikti tilshisi.
Baspasóz máslıhatynda Tájikstan Іshki ister mınıstri Ramazon Rahımzoda respýblıkadaǵy krımınogendik ahýal týraly málimet berdi. Onyń aıtýynsha, 2026 jyldyń alǵashqy alty aıynda el aýmaǵynda 11 731 qylmys tirkelgen. Bul ótken jyldyń sáıkes kezeńimen salystyrǵanda 10,4%-ǵa az. Al qylmystardyń ashylý deńgeıi 71%-dy qurady.
Mınıstr alaıaqtyqtyń eldegi eń kóp taralǵan qylmys túrleriniń biri bolyp qala beretinin atap ótti.
— Bıylǵy qańtar-maýsym aılarynda respýblıka boıynsha 2 002 alaıaqtyq faktisi tirkeldi. Ótken jyldyń osy kezeńinde mundaı 2 356 derek bolǵan. Osylaısha, tirkelgen alaıaqtyq faktileriniń sany 354 jaǵdaıǵa nemese shamamen 15%-ǵa azaıdy, — dedi Ramazon Rahımzoda.
Ol quqyq qorǵaý organdary alaıaqtyq qylmystarynyń aldyn alý jáne olardyń betin ashý baǵytyndaǵy jumysty kúsheıtip jatqanyn aıtty. Ásirese zamanaýı aqparattyq tehnologııalardy, uıaly baılanysty jáne ınternet-resýrstardy paıdalaný arqyly jasalatyn alaıaqtyqqa erekshe nazar aýdarylyp otyr.
Sondaı-aq halyq arasynda profılaktıkalyq jumystar júrgizýge, azamattardyń quqyqtyq saýattylyǵyn arttyrýǵa jáne jábirlenýshilerdiń ótinishterine jedel den qoıýǵa basymdyq berilip jatqany atap ótildi.
Osydan buryn Tájikstanda toılar men salt-joralar týraly zańdy buzýdyń 700-den asa deregi anyqtalǵanyn jazǵan bolatynbyz.
