Tájikstanda jarnamany efırge shyǵarý talaptaryn baqylaıtyn ortalyq quryldy
ASTANA. KAZINFORM – Tájikstanda «Teledıdar jáne radıo jelileriniń biryńǵaı jarnama ortalyǵy» atty memlekettik mekeme quryldy. Bul týraly baspasóz máslıhatynda Tájikstan Respýblıkasy Úkimeti janyndaǵy Teledıdar jáne radıo komıtetiniń tóraǵasy Nosır Saıdzoda málimdedi, dep habarlaıdy Kazinform menshikti tilshisi.
– Ortalyq qurýdyń maqsaty – jarnamany taratý protsesin retteý. Barlyq jarnama biryńǵaı ortalyqta qabyldanady, sodan keıin tapsyrys berýshi tańdaǵan telearnalar men radıostantsııalarǵa ornalastyrylady, - dedi N. Saıdzoda.
Ol jarnama berýshiler materıaldardy onlaın rejıminde usyna alatynyn jáne olar efırge shyqqan kezde habarlandyrýlar ala alatynyn túsindirdi. Bul klıentter úshin jarnamany ornalastyrý protsesin aıtarlyqtaı jeńildetedi.
Ortalyq tek jarnama materıaldaryn ornalastyrýmen ǵana emes, olardy daıyndaýmen de aınalysady. Budan basqa, olardyń til standarttaryn qosa alǵanda habar taratý talaptaryna sáıkestigi tekseriledi.
Buǵan deıin Tájikstan ekonomıkasy 2025 jyly 8,4%-ǵa óskenin jazǵanbyz.