Tájikstanda zańsyz maınıngke qylmystyq jaza engiziledi

ASTANA. KAZINFORM – Tájikstan zańsyz vırtýaldy aktıvterdi óndirýge qatysty qylmystyq jaýapkershilik engizedi. El parlamenti tıisti túzetýlerdi qabyldady, dep habarlaıdy agenttik tilshisi.

Qylmystyq kodekstiń jańa 253(2)-baby «Vırtýaldy aktıv óndirý úshin elektr energııasyn zańsyz paıdalaný» dep atalady. Bap úsh bólikten turady jáne 15-ten 75 myń somonıge deıingi (shamamen 1,6-8 myń AQSh dollary) aıyppul nemese 2 jyldan 8 jylǵa deıin bas bostandyǵynan aıyrý jazasyn qarastyrady.

Krıptovalıýta maınıngi úshin elektr energııasyn zańsyz paıdalanǵan jeke tulǵalar úshin 15-37 myń somonı kóleminde aıyppul belgilengen.

Al aldyn ala sóz baılasqan top úshin 37-75 myń somonı aıyppul nemese 2-5 jyl bas bostandyǵynan aıyrý jazasy qarastyrylady.

«Ózge iri kólemde» elektr energııasyn zańsyz paıdalanǵan uıymdasqan top músheleri 5 jyldan 8 jylǵa deıin bas bostandyǵynan aıyrylýy múmkin.

Parlamenttegi talqylaý barysynda Tájikstannyń bas prokýrory Habıbýllo Vohıdzoda maınıng fermalarynyń zańsyz jumysy eldegi elektr energııasy tapshylyǵyn kúsheıtip, qylmys sanynyń artýyna áser etkenin aıtty.

«Vırtýaldy aktıvterdiń zańsyz aınalymy elektr energııasyn urlaý, memleketke materıaldyq shyǵyn keltirý, qylmystyq jolmen alynǵan tabysty zańdastyrý jáne ózge de quqyqbuzýshylyqtardy jasaýǵa jol ashady», – dedi H. Vohıdzoda.

Aıta keteıik, Túrikmenstan maınıng pen krıptovalıýta bırjalarynyń qyzmetin zańdastyrdy.