Tájikstanda Ulttyq sý keńesi óz jumysyn bastady
ASTANA. KAZINFORM – Dýshanbede eldiń sý resýrstaryn paıdalaný, qorǵaý jáne turaqty basqarý boıynsha negizgi sheshimderdi úılestiretin Ulttyq sý keńesiniń alǵashqy otyrysy ótti, dep habarlaıdy Kazinform menshikti tilshisi.
TR Energetıka jáne sý resýrstary mınıstrliginiń málimetinshe, bul is-shara sý resýrstary salasyndaǵy uzaq merzimdi strategııalardy ázirleý jáne vedomstvoaralyq yntymaqtastyqty nyǵaıtýdaǵy mańyzdy qadam boldy. Jańa organ memlekettik sý saıasaty salasyndaǵy birizdilik, ashyqtyq jáne tıimdilikti qamtamasyz etedi.
- Búginde sý resýrstary kóptegen syrtqy faktorlardyń áserinen aıtarlyqtaı qysymǵa ushyrap otyr: klımattyń ózgerýi, muzdyqtardyń azaıýy, halyq sanynyń ósýi, ónerkásip pen energetıkanyń damýy jáne aýyl sharýashylyǵy qajettilikteriniń artýy. Munyń bári azyq-túlik qaýipsizdigi, «jasyl» energııa, jerdi sýarý jáne ekojúıeni qorǵaý salalarynda jańa daǵdarystarǵa ákelip soǵyp, sý resýrstaryn keshendi jáne turaqty basqarý qajettiligin arttyryp otyr, - dedi vıtse-premer-mınıstr Sýlaımon Zıezoda.
Otyrysta Tájikstan Respýblıkasynyń 2016-2025 jyldarǵa arnalǵan sý sektoryn reformalaý baǵdarlamasyn iske asyrý nátıjeleri jáne Zarafshan basseıni aýdanynyń sý resýrstaryn basqarýdyń 2026–2030 jyldarǵa arnalǵan Basseındik josparynyń jobasy qaraldy.
Sýdy tıimdi jáne uqypty paıdalaný, basseındik mekemeler jumysyn jaqsartý, sýdy úlestirý pýnktterine sý eseptegishterin ornatý jáne sýdy paıdalanýdy dál taldaý boıynsha naqty tapsyrmalar berildi.
Ulttyq sý keńesi Tájikstan Respýblıkasy Úkimeti janyndaǵy konsýltatıvtik-keńestik organ retinde 2025 jyldyń 29 mamyrynda quryldy.