Tájikstanda týrıster úshin jańa tólem engiziledi
ASTANA.KAZINFORM — Tájikstanda týrıstik alymdar, ruqsat berý qujattary úshin tólemder, aıyppul men halyqaralyq qarjy uıymdarynyń granttary esebinen qarjylandyrylatyn Týrızmdi damytý qory quryldy. Bul týraly Dýshanbe qalasyndaǵy Kazinform agenttiginiń menshikti tilshisi habarlady.
Tıisti qaýlyny Tájikstan úkimeti 2026 jylǵy 1 shildede qabyldaǵan. Qujat týrıstik qyzmet kórsetetin sýbektilerdi qoldaý jáne eldegi týrızm salasyn damytý maqsatynda ázirlengen.
Jańa qor birneshe qarjy kózinen qalyptastyrylady. Solardyń biri — Tájikstan azamattaryna shetelge shyǵýǵa arnalǵan týrıstik paketterdi satýdan túsken qarajattyń 5%-y kólemindegi aýdarym.
Sonymen qatar qorǵa sheteldik týrısterdiń el ishindegi saparynyń ár táýligi úshin týrıstik paketterden alynatyn jarna, týrıstik qyzmet kórsetýge ruqsat beretin qujatty rásimdeý úshin alynatyn tólem, osy alymdardy tóleýden jaltarǵany úshin salynatyn aıyppuldar, depozıtterden túsetin kirister, sondaı-aq halyqaralyq qarjy uıymdarynyń granttary men nysanaly qarajaty aýdarylady.
Qorǵa túsken qarajat týrıstik ınfraqurylymdy qurýǵa jáne damytýǵa, mamandardy daıarlaýǵa ári olardy áleýmettik qoldaýǵa, qyzmet kórsetý sapasyn arttyrýǵa, sondaı-aq eldiń týrıstik áleýetin tanystyrý men ilgeriletýge jumsalady.
Qordyń qarajatyn basqarý 13 adamnan turatyn Keńeske júkteldi. Keńesti Týrızmdi damytý komıtetiniń tóraǵasy men onyń birinshi orynbasary basqarady.
Keńes quramyna sondaı-aq mınıstrlerdiń orynbasarlary, tıisti memlekettik organdardyń basshylary jáne týrıstik qoǵamdyq birlestiktiń ókili kirdi.
Aıta keteıik, Tájikstan ekonomıkasy 8,2%-ǵa ósti.
