Tájikstanda toılar men salt-joralar týraly zańdy buzýdyń 700-den asa deregi anyqtaldy
ASTANA. KAZINFORM — Tájikstanda jyl basynan beri «Dástúrlerdi, saltanatty is-sharalar men salt-joralardy retteý týraly» zańdy buzýǵa qatysty 704 ákimshilik is qaraldy, dep habarlaıdy Kazinform agenttiginiń Dýshanbedegi menshikti tilshisi.
Bul týraly Din isteri, dástúrlerdi, saltanatty is-sharalar men salt-joralardy retteý komıteti tóraǵasynyń orynbasary Farrýhýllo Olımzoda eseptik baspasóz máslıhatynda málimdedi.
Komıtettiń málimetinshe, alǵashqy alty aıda elde 35 699 saltanatty is-shara men salt-jora tirkelgen. Zań talaptarynyń saqtalýyn baqylaý maqsatynda 8 661 reıdtik is-shara ótkizildi.
Zań talaptarynyń kúsheıtilgenine qaramastan, quqyq buzýshylyqtar sany artyp keledi. Esepti kezeńde Tájikstan Respýblıkasynyń Ákimshilik quqyq buzýshylyq týraly kodeksiniń 481-baby boıynsha 704 ákimshilik is qaralyp, bul 2025 jyldyń sáıkes kezeńimen salystyrǵanda 74 jaǵdaıǵa kóp boldy.
— Qaralǵan isterdiń nátıjesinde 699 jaǵdaıda ákimshilik jaza taǵaıyndaldy, taǵy 5 is sottardyń sheshimimen toqtatyldy. Salynǵan aıyppuldardyń jalpy somasy 5,097 mıllıon somonıdi (shamamen 261 mıllıon teńge) qurady, — dedi Farrýhýllo Olımzoda.
Aıta keteıik, 2007 jyly qabyldanǵan «Tájikstan Respýblıkasyndaǵy dástúrlerdi, saltanatty is-sharalar men salt-joralardy retteý týraly» zań ulttyq qundylyqtardy saqtaýǵa jáne úılený toıy, jerleý rásimi, bala týýǵa baılanysty salt-joralar men basqa da is-sharalardy ótkizý kezinde orynsyz ysyrapshyldyqtyń aldyn alýǵa baǵyttalǵan.
Buǵan deıin 2026 jyldyń birinshi toqsanynda Tájikstanǵa 370 000-nan astam sheteldik týrıst barǵanyn jazǵan bolatynbyz.
