Tájikstanda Táýelsizdiktiń 35 jyldyǵyna oraı aýqymdy raqymshylyq jarııalandy
ASTANA.KAZINFORM — Tájikstanda el táýelsizdiginiń 35 jyldyǵyna oraı 18 myńnan astam sottalǵan azamatqa raqymshylyq jasalady. Tıisti zańǵa Tájikstan Prezıdenti Emomalı Rahmon qol qoıdy.
Tájikstan Prezıdentiniń baspasóz qyzmetiniń málimetinshe, «Raqymshylyq týraly» zań qylmys jasaǵan azamattarǵa túzelýge, otbasyna qaıta oralyp, qoǵamǵa paıdaly eńbekpen aınalysýǵa múmkindik beredi.
Zańnyń kúshi jalpy sany 18 038 sottalǵan adamǵa taralady. Onyń ishinde 11 305 adam bas bostandyǵynan aıyrý oryndarynan, túzeý mekemelerinen jáne bas bostandyǵynan aıyrýmen baılanysty emes ózge de jazalardan bosatylady.
Al 6 733 adamnyń ótelmegen jaza merzimi qysqartylady.
Qujat áıelder men kámeletke tolmaǵandarǵa qatysty jeńildikterdi kóbirek qarastyrady. Raqymshylyq 507 áıel men 134 jasóspirimge qoldanylady.
Zańdy iske asyrý tıisti memlekettik organdarǵa júktelip, ony oryndaý eki aı ishinde qamtamasyz etilýi tıis.
Sondaı-aq jergilikti atqarýshy organdarǵa raqymshylyqqa ilikken azamattardy jumyspen qamtý, kámeletke tolmaǵandardyń bilim alýyn uıymdastyrý, olardy tirkeý jáne biryńǵaı esepke alý boıynsha qajetti sharalardy qabyldaý tapsyryldy.
