Tájikstanda taǵy da jer silkindi

ASTANA. KAZINFORM — 14 sáýirge qaraǵan túni Tájikstanda magnıtýdasy 4,5 baldyq jer silkinisi boldy. Bul týraly Eýropa-Jerorta teńizi seısmologııalyq ortalyǵy (EMSC) málimdedi.

Jerasty dúmpýleri Rasht qalasynan 23 shaqyrym jerde UTC 0:44 (Qazaqstan ýaqytymen 5:44) kezinde tirkelgeni atap ótildi. Jer silkinisiniń oshaǵy 5 shaqyrym tereńdikte ornalasqan, dep jazady DW.

Bir kún buryn, 13 sáýirde Tájikstanda eki ret jer silkingen. Olardyń oshaqtary oblys ortalyǵy Rasht qalasynyń mańynda, el astanasy Dýshanbeden shyǵysqa qaraı 180 shaqyrym jerde ornalasqan.

AQSh geologııalyq qyzmetiniń málimetinshe, kúndiz jergilikti ýaqyt boıynsha 09:24–te alǵashqy jer silkinisi tirkelgen. Magnıtýdasy 5,8. Onyń kórshiles Ózbekstan aýmaǵyna áser etkeni, Tashkentte 2 balldyq kúshpen jerasty dúmpýleri sezilgeni aıtyldy.

Ekinshi jer silkinisi jergilikti ýaqyt boıynsha 12:14–te boldy. EMSC mamandary jer silkinisiniń magnıtýdasyn 4,2 dep baǵalady. Jer silkinisiniń oshaǵy Rasht qalasynan shyǵysqa qaraı 40 shaqyrym jerde ornalasqan.

Buǵan deıin Tájikstanda jer silkinip, 29 úı men mektep zaqymdanǵanyn jazǵan edik.