Tájikstanda sý resýrstary salasyndaǵy halyqaralyq syılyq taǵaıyndaldy
ASTANA. KAZINFORM – Tájikstan prezıdenti Emomalı Rahmon «Tájikstan Respýblıkasy Prezıdentiniń sý salasyndaǵy halyqaralyq syılyǵyn» taǵaıyndaý týraly jarlyqqa qol qoıdy, dep habarlaıdy Kazinform agenttiginiń Dýshanbedegi menshikti tilshisi.
Tájikstan prezıdenti baspasóz qyzmetiniń málimetinshe, jańa marapat halyqaralyq yntymaqtastyqty damytýǵa, ǵylymı zertteýlerge, ornyqty saıasatty qalyptastyrýǵa, sondaı-aq sý resýrstary men klımattyń ózgerýine qatysty jahandyq máselelerdi sheshýge eleýli úles qosqan tulǵalar men uıymdardy yntalandyrý jáne eńbegin moıyndaý maqsatynda taǵaıyndalǵan.
«Syılyqtyń taǵaıyndalýy zertteýshiler men ǵylymı uıymdardyń sý resýrstaryna qatysty máselelerdi tereń zertteýge degen qyzyǵýshylyǵyn arttyrýǵa yqpal etedi. Sonymen qatar tehnologııalar almasýdy damytýǵa, muzdyqtardy saqtaý jáne taza aýyz sýǵa qoljetimdilikti qamtamasyz etý maqsatynda ınvestıtsııalar tartýǵa múmkindik beredi», – delingen habarlamada.
Syılyqqa úmitkerlerdi anyqtaý úshin arnaıy komıssııa qurylady. Onyń quramyna BUU ýnıversıteti Sý, qorshaǵan orta jáne densaýlyq ınstıtýtynyń ókilderi de enedi.
Marapatty tabystaý rásimi Tájikstanda ótetin sý resýrstary salasyndaǵy halyqaralyq is-sharalar aıasynda uıymdastyrylady.
Jarlyqqa sáıkes, Tájikstan úkimetine eki aı ishinde syılyq týraly erejeni ázirlep, bekitý jáne tıisti komıssııanyń quramyn jasaqtaý tapsyryldy.
«Bul bastama sý resýrstary máselelerin halyqaralyq deńgeıde talqylaýdy jandandyryp, turaqty damýǵa qatysty jahandyq kún tártibindegi sý taqyrybynyń mańyzyn arttyrýǵa baǵyttalǵan», – dep atap ótti tájik tarapy.
Aıta keteıik, buǵan deıin Dýshanbede ótken 4-shi sý konferentsııasynda Emomalı Rahmon sý máselelerin turaqty damý jónindegi halyqaralyq kún tártibiniń ózegine shyǵarýǵa baǵyttalǵan birqatar praktıkalyq usynys aıtyp, Ortalyq Azııadaǵy transshekaralyq yntymaqtastyq aıasynda senim men seriktestikti nyǵaıtýǵa shaqyrǵan bolatyn.
