Tájikstanda Naýryzdyń halyqaralyq ortalyǵy qurylady

ASTANA. KAZINFORM — Tájikstanda Naýryzdyń halyqaralyq ortalyǵy qurylady. Bul týraly el prezıdenti Emomalı Rahmon jyl saıynǵy parlamentke Joldaýynda málimdedi, dep habarlaıdy Kazinform menshikti tilshisi.

Memleket basshysy baı gýmanıstik salt-dástúrler, sonyń ishinde Naýryz – ata-babadan qalǵan biregeı mura ekenin atap ótti.

Onyń aıtýynsha, bul qundylyqtardy tereń zerttep, bolashaq urpaqqa rýhanı qazyna retinde amanattaý qajet. E.Rahmon Naýryzdy tek halyqtyq mereke ǵana emes, myńdaǵan jyldar boıy qalyptasqan gýmanızmdi, urpaqtar sabaqtastyǵyn jáne rýhanı qundylyqtardy beıneleıtin máńgilik fılosofııa dep sıpattady.

– Tarıhı jadty jańǵyrtý azamattardyń, ásirese ult pen memlekettiń bolashaǵy sanalatyn jastardyń ulttyq sanasyn nyǵaıtýda mańyzdy ról atqarady, – dedi Tájikstan prezıdenti.

Jańa ortalyq Naýryz tarıhı jad pen rýhanı muranyń ajyramas bóligi sanalatyn elderdiń ǵalymdary, zertteýshileri men mádenıet qaıratkerlerin biriktiretin halyqaralyq alańǵa aınalmaq.

Tájikstannyń Ulttyq ǵylym akademııasyna, sondaı-aq ózge de ǵylymı-zertteý jáne jobalyq mekemelerge ǵalymdar men mamandardy tarta otyryp, Naýryzdyń halyqaralyq ortalyǵynyń tujyrymdamasyn ázirleý tapsyryldy.

Aıta keteıik, Memleket basshysy Naýryz meıramyn keńinen dáripteýimiz kerek ekenin aıtty.