Tájikstanda Mehrgon egin jınaý merekesi toılanyp jatyr
ASTANA. KAZINFORM — Tájikstan astanasynda merekelik is-sharalar, kontsertter, halyq shyǵarmashylyǵy kórmeleri, dástúrli oıyndar men tátti ónimder – altyn kúzdiń ejelgi sımvoly – Mehrgon egin jınaý naýqanyn toılaýdyń bir bóligi, dep habarlaıdy Kazinform tilshisi.
Mehrgon kúni el turǵyndary jaqsy ónim úshin bir-birine alǵys aıtyp, molshylyq bolsyn dep tilek tileıdi. Sondyqtan bul mereke jyl saıyn saltanatty túrde toılanady.
Qazirgi ýaqytta elde jappaı merekelik is-sharalar uıymdastyrylyp jatyr. Dýshanbede basty shara elordanyń ortalyq Fırdavsı saıabaǵynda ótýde. Saıabaqtyń kireberisin jemister men kókónisterden turatyn pıramıdalar bezendiredi. Munda dástúrli jármeńke ashyldy. Eldiń túkpir-túkpirinen dıqandar ónimin ákeldi. Mundaǵy turǵyndar men qala qonaqtary jármeńke ashylmaı jatyp-aq ortalyqqa jınala bastady.
Qarnaı, doıra, dýtar dybystary merekeniń bastalýyn bildiredi. Mehrgondy madaqtaǵan áýender men ánder estiledi. Folklorlyq-etnografııalyq toptar ózderiniń ánderi men bıleri arqyly tájik ulttyq mádenıetiniń erekshe shyǵystyq dámi men baılyǵyn kórsetedi.
Ulttyq taǵamdar kórmesinde kelýshilerdi shyǵys qonaqjaılylyǵymen qarsy alyp, altyn qońyr sambasany, jańa pisken qurtoby — qat-qabat shelpekten, jańa pisken kókónisterden, maı men qyshqyl ıogýrttan jasalǵan taǵamdy jáne, árıne, palaýdy tamashalady. Sondaı-aq et pen taý shópterinen jasalǵan taǵamdar boldy.
— Baýyrlas Tájikstan halqynyń osyndaı tamasha jáne ejelgi festıvaliniń kýási bolǵanyma óte qýanyshtymyn. Dýshanbede demalysta júrgende bul festıvalge qatysýdyń sáti tústi. Bul jerde men tájik halqynyń tarıhymen, mádenıetimen jáne rýhanı qundylyqtarymen tereńirek tanysýǵa múmkindik aldym, - dep óz áserimen bólisti jerlesimiz Gúlmıra Osanova.
Mehrgonnyń negizgi rámizderi adamdar men tabıǵat arasyndaǵy rızashylyq, tepe-teńdik jáne úılesimdilik ıdeıalaryn kórsetedi. Jańa eginniń jemisteri – alma, júzim, anar, bıdaı, bal, jańǵaqtar merekelik dastarqandarǵa qoıylady. Bul – molshylyqtyń belgisi.
Merekeniń túsi – kúlgin nemese qyzǵylt sary tústi, bul – kúzgi ýaqytpen baılanysty. Adamdar jańa kıim kıedi, otbasylyq dastarqan jaıylyp, bir-birine syılyqtaryn beredi.
Mehr ıdeıasy – dostyq pen súıispenshilik áleýmettik jáne rýhanı prıntsıp retinde erekshe oryn alady.
Qazirgi Tájikstanda Mehrgon mádenı jańǵyrýdy bastan keshirip jatyr. Atap aıtqanda ol 2009 jyly prezıdent Emomalı Rahmonnyń bastamasymen qaıta jandandy. 2017 jyly Mehrgon merekesi Tájikstannyń materıaldyq emes mádenı muralar tizimine engizildi, sonymen qatar ıÝNESKO tizimine engizý qarastyryldy.