Tájikstanda lúpil men repost úshin qylmystyq jaza joıyldy

ASTANA. KAZINFORM — Tájikstan prezıdenti Emomalı Rahmon áleýmettik jelidegi reaktsııalar úshin qylmystyq jazany alyp tastaıtyn zańǵa qol qoıdy, dep habarlaıdy DW.

Tájikstanda áleýmettik jelidegi materıaldarǵa lúpil basyp, repost jasaǵany úshin jazalaý týraly norma Qylmystyq kodeksten alyndy. «Azattyq radıosynyń» habarlaýynsha, el prezıdenti Emomalı Rahmon tıisti zańǵa sársenbi, 14 mamyrda qol qoıdy.

— Túzetýler lańkestikke jarııa shaqyrýlar jáne ınternette lańkestikti aqtaýdy kózdeıtin baptarǵa qatysty bolyp otyr, — dep naqtylady basylym.

2018 jyldan beri Tájikstanda lúpilden bastap reposttarǵa deıingi eń az belsendilik úshin 10-15 jylǵa deıin bas bostandyǵynan aıyrylý múmkin bolǵan, deıdi tilshiler.

«Azattyq radıosy» Tájikstan bas prokýrorynyń birinshi orynbasary Ýmed Karımzodaǵa silteme jasap atap ótkendeı, búginde Ortalyq Azııanyń osy elinde áleýmettik jelilerdegi pikiri men reaktsııasy úshin 1500-den astam adam jazasyn ótep jatyr. 

2024 jyldyń kókteminde Emomalı Rahmonnyń ózi «bul tájirıbeni toqtatý kerek» ekenin, óıtkeni «adamdardy tek ınternettegi belsendiligi úshin jazalaýǵa bolmaıtynyn» málimdedi. Sáýirde Tájikstan parlamentiniń tómengi palatasy tıisti túzetýlerdi biraýyzdan qoldady.

Eske sala ketsek, ótken jyly Tájikstanda «ulttyq mádenıetke jat» kıim kııýge tyıym salyndy.