Tájikstanda kúshtik qurylymdarda kadrlyq ózgeris júrgizildi

ASTANA. KAZINFORM – Tájikstan Respýblıkasynyń basshysy eldiń kúshtik qurylymdarynda kadrlyq ózgerister jasady, dep habarlaıdy Kazinform agenttiginiń menshikti tilshisi.

Tájikstan prezıdentiniń baspasóz qyzmetiniń málimetinshe, 16 qańtarda Emomalı Rahmon Qorǵanys mınıstrliginde, Ulttyq gvardııada, Shekara áskerlerinde, Memlekettik qarjylyq baqylaý jáne sybaılas jemqorlyqqa qarsy kúres agenttiginde, sondaı-aq Ádilet mınıstrliginiń Qylmystyq jazalardy oryndaý bas basqarmasynda birqatar kadrlyq taǵaıyndaýlar júrgizgen.

— Atalǵan kúshtik qurylymdardyń áskerı bólimderi men bólimsheleriniń komandalyq quramyna jas, daryndy, joǵary bilikti jáne otanshyl kadrlar taǵaıyndaldy, — dep habarlady prezıdenttiń baspasóz qyzmeti.

Emomalı Rahmon óz sózinde óńirdegi jáne álemdegi jaǵdaıǵa baılanysty Qarýly kúshterdiń, áskerı bólimder men bólimshelerdiń jaýyngerlik daıarlyǵynyń jaı-kúıin taldap, talqylady jáne naqty mindetter qoıdy.

Memlekettik shekarany qorǵaýǵa, jaýyngerlik ázirlikti arttyrýǵa, shetel tilderin meńgerýge, zamanaýı áskerı tehnıkany ıgerýge, sondaı-aq komandırler men áskerı qyzmetshiler arasyndaǵy ózara túsinistikti nyǵaıtýǵa erekshe nazar aýdaryldy.

Buǵan deıin tájik-aýǵan shekarasynda tórt jańa shekara zastavasy ashylǵany habarlanǵan bolatyn.