Tájikstanda quny 100 mln dollar bolatyn iri IT Hub qurylysy bastaldy
ASTANA. KAZINFORM - Tájikstan astanasy Dýshanbede tsıfrlyq tehnologııalar men ınnovatsııalar salasyndaǵy eń iri jobalardyń biri – IT Hub Dushanbe kesheniniń qurylysy bastaldy. Bul týraly Kazinform agenttiginiń menshikti tilshisi habarlady.
Zamanaýı keshenniń irgetasyn qalaý rásimine Tájikstan Respýblıkasy Joǵarǵy Májilisi Ulttyq keńesiniń tóraǵasy, Dýshanbe qalasynyń meri Rýstam Emomalı qatysty.
IT Hub Dushanbe quramyna IT-mektep, IT Park, aqparattyq tehnologııalar bıznes-ortalyǵy jáne jasandy ıntellektiniń óńirlik ortalyǵy kiredi.
— Joba tsıfrlyq ekonomıkany damytýǵa, zamanaýı tehnologııalardy keńinen engizýge, aqparattyq qoǵam qalyptastyrýǵa jáne ulttyq ekonomıkanyń básekege qabilettiligin arttyrýǵa baǵyttalǵan. Sonymen qatar ol elde jańa ınnovatsııalyq ári tsıfrlyq ortanyń qalyptasýyna berik negiz qalaıdy, — dep habarlady Dýshanbe merııasynyń Telegram-arnasy.
Tájikstannyń Innovatsııalar jáne tsıfrlyq tehnologııalar agenttiginiń dırektory Hýrshed Mırzonyń aıtýynsha, keshenniń jalpy aýmaǵy 53 myń sharshy metrden asady.
Jobany júzege asyrýǵa 100 mıllıon AQSh dollary kóleminde ınvestıtsııa tartylmaq.
Buǵan deıin Tájikstanda Qorǵanys ónerkásibi komıteti qurylatyny týraly jazdyq.
