Tájikstanda kóripkelge barǵandar da jazalanady
ASTANA. KAZINFORM – Tájikstanda baqsylyq jáne kóripkeldikpen kúresýdiń jańa tásili qolǵa alyndy. Bul týraly eldiń Іshki ister mınıstrliginiń baspasóz qyzmeti habarlady.
Endi Іshki ister mınıstrligi baqsylar men kóripkelderdiń ózderin jaýapqa tartýmen qatar, olarǵa júgingen azamattarǵa da shara qoldanatyny atap ótildi.
– Júrgizilgen profılaktıkalyq is-sharalardyń nátıjesinde kóripkelder men baqsylarǵa júgingen azamattar olardyń qyzmetterine aqy tólep, sol arqyly kóripkelder isin jandandyryp otyrǵan. Qyzmetine júgingen barlyq tulǵalar ІІM-niń aımaqtyq organdaryna shaqyrylyp, olarǵa qatysty tıisti hattamalar jasalyp, olardyń málimetteri men fotosýretteri mınıstrliktiń málimetter bazasyna engiziledi, – delingen vedomstvo málimetinde.
Sońǵy bir aıda mınıstrlikte 150-den astam kóripkel tirkelip, olarǵa zań aıasynda shara qoldanylyp jatqany habarlandy.
Sondaı-aq, sońǵy kezderi quqyq qorǵaý organdary kóripkelderdi anyqtap, turaqty reıdter ótkizýmen belsendi aınalysýda. Osy áreketterge qaramastan, olardyń qyzmetin paıdalanatyndar sany áli de kóp.
Іshki ister mınıstrliginiń málimetinshe, jyl basynan beri Dýshanbede baqsylyqpen aınalysqan 141 adam ustalǵan.
Aǵymdaǵy jyldyń 21 maýsymynda Tájikstan Respýblıkasynyń «Ákimshilik jaýapkershilik týraly kodeksiniń» 482-babyna engizilgen ózgertýlerge sáıkes, kóripkeldik jáne baqsylyqpen aınalysqany úshin eń tómengi aılyq jalaqynyń 80-nen 100-ge deıingi mólsherinde aıyppul salý nemese 10-nan 15 táýlikke deıingi merzimge ákimshilik qamaqqa alý jazasy taǵaıyndalady.
