Tájikstanda Qorǵanys ónerkásibi komıteti qurylady
ASTANA. KAZINFORM — Emomalı Rahmon Tájikstan Úkimeti janynan Qorǵanys ónerkásibi komıtetin qurý týraly jarlyqqa qol qoıdy. Bul týraly agenttiktiń Dýshanbedegi menshikti tilshisi habarlady.
Qujatqa sáıkes, jańa vedomstvonyń ortalyq apparaty 38 qyzmetkerden turady. Onyń ishinde 8 áskerı qyzmetker qarastyrylǵan.
Komıtet qurylymynda tóraǵanyń eki orynbasary qyzmeti engiziledi. Sondaı-aq 7 adamnan turatyn alqa qurylady.
Úkimetke jańa qurylymnyń jumysyn jolǵa qoıý tapsyryldy. Tájikstannyń Investıtsııalar jáne memlekettik múlikti basqarý jónindegi memlekettik komıteti mekemege ákimshilik ǵımarat bólýi tıis.
Al Tájikstannyń Qarjy mınıstrligi respýblıkalyq bıýdjetten qarjy qarastyrýǵa mindetteldi.
Buǵan deıin qorǵanys ónerkásibine qatysty máseleler Tájikstannyń Ónerkásip jáne jańa tehnologııalar mınıstrliginiń quzyrynda bolǵan.
Endi bul ókilettikter mınıstrlik qurylymynan shyǵarylady. Sonymen qatar salalyq qaýlydan qorǵanys ónerkásibine qatysty barlyq normalar alynyp tastalady.
Osyǵan deıin Qazaqstan men Tájikstan arasyndaǵy AÓK salasyndaǵy taýar aınalymy 595 mln dollarǵa jetkeni týraly jazdyq.
