Tájikstanda qylmys deńgeıi shamamen 5 paıyz kóbeıdi
ASTANA. KAZINFORM — Tájikstanda 2025 jyldyń qorytyndysy boıynsha qylmystyń 1 134 jaǵdaıǵa nemese 4,8 paıyz ósýi anyqtaldy, dep habarlaıdy agenttiktiń menshikti tilshisi.
Tájikstannyń ishki ister mınıstri Ramazon Rahımzoda baspasóz máslıhatynda 2025 jyly respýblıkada 23 448 qylmys tirkelgenin, bul ótken jylmen salystyrǵanda 1 134 oqıǵaǵa kóp ekenin habarlady. Qazir elde qylmystyń ashylý kórsetkishi — 77,99 paıyz.
Memlekette zorlaý, tonaý, esirtki saýdasy kóbeıip, adam óltirý, adam urlaý, buzaqylyq azaıdy. Esesine, kámelet jasqa tolmaǵandardyń qatysýymen jasalǵan qylmystardyń óskeni baıqalady. 2024 jyly 674 oqıǵa tirkelse, byltyr 715 jaǵdaı anyqtaldy.
Mınıstr jol-kólik oqıǵalary men sonyń saldarynan qaza tapqandar sanynyń artqanyn atap ótti. Byltyr 1 373 jazataıym oqıǵa tirkelip, saldarynan 643 adam qaza taýyp, 1542-i jaraqat alǵan. Al bir jyl buryn 1 233 apat oryn alyp, 552 adam qaza bolǵan.
Eske salaıyq, Tájikstanda áıelderge qatysty 3 myńnan astam qylmys tirkelgen. Sonymen qatar elde byltyr 5 tonnadan astam esirtki tárkilendi.