Tájikstanda qazaqtyń uly aqyndary, oıshyldary men ǵalymdarynyń kitaptary tanystyryldy

ASTANA. KAZINFORM — Tájikstan astanasynda ótip jatqan halyqaralyq kitap jármeńkesinde qazaqtyń uly aqyndary, oıshyldary men ǵulamalarynyń kitaptary qoǵam nazaryna usynyldy, dep habarlaıdy Kazinform menshikti tilshisi.

Kórme aıasynda Qazaqstan elshiligi qazaq halqynyń baı mádenı-tarıhı murasyn kórsetetin kitaptar toptamasyn tanystyryp ótti. 

Eksponattar arasynda qazaqtyń uly aqyny, oıshyly Abaı Qunanbaevtyń, ataqty aqyn Jambyl Jabaevtyń, qazaqtyń tuńǵysh geologi, akademık Qanysh Sátbaevtyń basylymdary, sondaı-aq qazaqtyń salt-dástúri, ádet-ǵurpy, ulttyq fılosofııasy, mádenıeti týraly eńbekter boldy. 

Ekspozıtsııa kórmege kelýshiler, sonyń ishinde Tájikstannyń ǵylymı jáne mádenı zııaly qaýym ókilderi, sheteldik dıplomatııalyq ókildikter jáne qalyń jurtshylyqtyń úlken qyzyǵýshylyǵyn týdyrdy. Qazaqstannyń kórmege qatysýy eki el arasyndaǵy gýmanıtarlyq dıalogty damytýǵa qosqan qomaqty úles bolyp, mádenı baılanystardy odan ári nyǵaıtýǵa umtylysyn tanytty.

Tájikstannyń Mádenıet mınıstri óz sózinde mundaı sharalardyń álem halyqtary arasynda ózara túsinistik pen dostyqty tereńdetý úshin mańyzdylyǵyn atap ótti.

Budan buryn qazan aıynyń basynda Memleket basshysy Tájikstan prezıdenti Emomalı Rahmonmen kezdesken edi.

TMD memleketteri basshylary keńesiniń otyrysynda sóz sóılep, jıynǵa qatysýshylarǵa iltıpat bildirgen Qasym-Jomart Toqaev qonaqjaılyq tanytyp, sammıtti joǵary deńgeıde uıymdastyrǵan tájik tarapy men Prezıdent Emomalı Rahmonǵa alǵys aıtty.