Tájikstanda qazaqstandyq bitimgerlerdi eske alý rásimi ótti
ASTANA. KAZINFORM — Tájikstan astanasynda 1995 jyly Tájikstan-Aýǵanstan shekarasynda TMD-nyń syrtqy shekaralaryn qorǵaý boıynsha jaýyngerlik paryzdy atqarý kezinde qaza tapqan qazaqstandyq sarbazdardy eske alý rásimi ótti, dep habarlaıdy Kazinform-nyń Dýshanbedegi menshikti tilshisi.
Qazaqstan elshisi Ýálıhan Tórehanov quttyqtaý sózinde 1993 jyldyń qańtarynda TMD memleket basshylary tájik-aýǵan shekarasyn qarýly toptardan birlesip qorǵaý týraly kelisimge qol qoıǵanyn atap ótti. Segiz jyl boıy 10 myńnan astam qazaqstandyq sarbaz ben ofıtser TMD-nyń ońtústik shekaralaryn qorǵap, baýyrlas Tájikstan halqyna kómek kórsetti.
— 1995 jyldyń sáýirinde Darvaz aýdanynyń Pshıhavar shatqalyndaǵy qaıǵyly oqıǵalar kezinde Qazaqstannyń 7-shi birlesken rotasy shabýylǵa ushyrady, bes saǵatqa sozylǵan shaıqas saldarynan 17 áskerı qyzmetshi qaza taýyp, ondaǵan adam jaraqat aldy. Qaza tapqan bes áskerı qyzmetshi 2-shi dárejeli «Aıbyn» ordenimen, on eki áskerı qyzmetshi — «Jaýyngerlik erligi úshin» medalimen marapattaldy. Biz qazir sol oqıǵalardyń ardagerlerimen birge jaýyngerlerimizdi eske alý úshin birge turmyz, — dedi dıplomat.
TR Shekara áskerleri tóraǵasynyń burynǵy orynbasary, general-leıtenant Safaralı Saıfýlloev qazaq halqynyń Tájikstannyń memlekettik shekarasy men TMD-nyń ońtústik shekaralarynyń qaýipsizdigin qamtamasyz etý boıynsha janqııarlyq kómek kórsetýdegi úlesin atap ótti.
— Qazaqstandyq sarbazdar erekshe batyldyq, tózimdilik jáne áskerı boryshyna adaldyq úlgisin tanytty. Biz óz esimderin halyqtarymyzdyń tarıhynda máńgilikke saqtap qalǵan baýyrlas Qazaqstannyń 17 ulyn erekshe qaıǵyryp eske alamyz. Olardyń erlikteri — shynaıy baýyrlastyq, yntymaqtastyq jáne ózara qoldaýdyń sımvoly. Tájikstan halqynyń beıbitshiligi men tynyshtyǵy úshin qurban bolǵan batyrlarǵa máńgilik dańq, — dep túıindedi S. Saıfýlloev.
Qazaqstandyq sarbazdardyń erligin eske alý úshin 2007 jyly Dýshanbedegi Á. Fırdaýsı saıabaǵynda jáne 2019 jyly Darvazada qaza tapqan sarbazdardyń qyzmet atqarǵan jerde eskertkish taqtalar ornatyldy. Adamdar jyl saıyn osy taqtalarǵa gúl shoqtaryn ákelip júr.
Osyǵan deıin Tájikstannyń ardagerleri qazaqstandyq ınternatsıonalıst-jaýyngerlerdi quttyqtaǵanyn jazdyq.