Tájikstanda Qazaqstan Respýblıkasynyń kúni atalyp ótti
DÝShANBE. KAZINFORM –Qazaqstannyń Tájikstandaǵy elshiligi Dýshanbede Respýblıka kúnine oraı saltanatty qabyldaý uıymdastyrdy, dep habarlaıdy Kazinform agenttiginiń Dýshanbedegi menshikti tilshisi.
Qazaqstannyń Tájikstandaǵy elshisi Ýálıhan Tórehanov qabyldaýǵa kelgen qonaqtardy qarsy aldy. Olardyń qatarynda Tájikstannyń memlekettik organdarynyń ókilderi, dıplomatııalyq mıssııalardyń basshylary men qyzmetkerleri, halyqaralyq uıymdar, isker toptar men buqaralyq aqparat quraldarynyń ókilderi, sondaı-aq Tájikstanda turatyn qazaqstandyqtar boldy.
Resmı bólimde Qazaqstan men Tájikstannyń memlekettik ánurandary oryndaldy.
Quttyqtaý sózinde elshi 1990 jylǵy 25 qazanda Qazaq KSR-iniń memlekettik egemendigi týraly deklaratsııa qabyldanǵanyn eske saldy.
Onyń aıtýynsha, bul qujat Qazaqstannyń táýelsizdik alý jolyndaǵy mańyzdy kezeń boldy.
-Biz úshin bul kún Túrik qaǵanattary, Altyn Orda jáne Qazaq handyǵy dáýirinen bastaý alatyn qazaq memlekettiliginiń ǵasyrlar boıǵy sabaqtastyǵyn bildiredi, – dedi Ýálıhan Tórehanov.
Dıplomat jıynǵa qatysýshylarǵa Qazaqstannyń áleýmettik-ekonomıkalyq damýy týraly da aıtyp berdi. Qazirgi ýaqytta óńirdiń jıyntyq jalpy ishki óniminiń jartysynan astamy Qazaqstannyń úlesine tıesili. Elge tartylǵan sheteldik ınvestıtsııa kólemi 480 mlrd dollardan asty.
Qazaqstan jańa ınvestıtsııalyq kezeńdi bastap, Eýrazııadaǵy negizgi kólik-logıstıkalyq torap retindegi rólin nyǵaıtyp keledi. Bul baǵytta Transkaspıı halyqaralyq kólik baǵyty men «Soltústik – Ońtústik» dáliziniń mańyzy zor.
Syrtqy saıasat máselesine toqtalǵan elshi Qazaqstan aýmaǵynda 468 ıadrolyq synaq ótkizilgenin eske saldy. Osyǵan baılanysty elimiz ıadrolyq qarýdy taratpaý jónindegi jahandyq kúsh-jigerdi qoldaýdy jalǵastyrady. Bul mindettemeler Astananyń Halyqaralyq bıologııalyq qaýipsizdik agenttigin qurý jónindegi bastamasymen de tolyqtyrylady.
Qazaqstannyń syrtqy saıasatyndaǵy basym baǵyttardyń biri – Ortalyq Azııa.
-Biz Ortalyq Azııa básekelestik emes, yntymaqtastyq; bóliný syzyqtary emes, ózara baılanys óńirine aınalýy kerek dep senemiz, – dedi elshi.
Ýálıhan Tórehanov Qazaqstan men Tájikstan arasyndaǵy qarym-qatynasqa da erekshe toqtaldy. Onyń aıtýynsha, eki el basshylarynyń saıası erik-jigeriniń arqasynda ekijaqty baılanystar sapalyq turǵydan jańa deńgeıge kóterildi.
2026 jyldyń alǵashqy segiz aıynda eki el arasyndaǵy taýar aınalymy 1 mlrd dollardan asyp, 34%-ǵa ósti. Qazaqstan Tájikstan ekonomıkasyna ınvestıtsııa salatyn iri elderdiń qataryna kiredi. Qazaqstannyń Tájikstanǵa salǵan ınvestıtsııa kólemi 148 mln dollardan asty.
-Tarıh bizdi kórshi etti, qundylyqtarymyzdyń ortaqtyǵy men bir-birimizge degen qurmet baýyr etti, ekonomıkamyz senimdi serikteske aınaldyrdy, al ortaq múddelerimiz ben ózara senimimiz odaqtas etti, – dep atap ótti dıplomat.
Saltanatty kesh kontserttik baǵdarlamamen jalǵasty. Qonaqtarǵa aspaptyq ansambl óner kórsetip, jas ártister qazaqtyń halyq ánderi men bılerin oryndady. Sondaı-aq jıynǵa qatysýshylarǵa ulttyq taǵamdar usynyldy.
Aıta keteıik, Astanada Respýblıka kúnine arnalǵan saltanatty kontsert ótti.
