Tájikstanda IT mamandarynyń jalaqysy ósedi
ASTANA. KAZINFORM – Tájikstanda IT mamandary úshin jańa yntalandyrý júıesi engiziledi, dep habarlaıdy Kazinform agenttiginiń Dýshanbedegi tilshisi NIAT «Hovarǵa» silteme jasap.
Tájikstan prezıdenti Emomalı Rahmon zamanaýı tehnologııalardy damytýǵa, adamı kapıtaldy jaqsartýǵa jáne eldegi ómirdiń barlyq salasyn tsıfrlandyrýǵa baǵyttalǵan «Aqparattyq-kommýnıkatsııalyq tehnologııalar salasyndaǵy qyzmetkerlerdiń jalaqysy men jalaqysyna qosymsha aqy tóleýdi retteý týraly» jarlyqqa qol qoıdy.
Qujat el basshylyǵynyń tsıfrlyq ekonomıkaǵa kóshý jáne «Tájikstan Respýblıkasynyń 2030 jylǵa deıingi ulttyq damý strategııasyn» iske asyrý saıasatyn jalǵastyrady.
Bul bastama eldiń ıntellektýaldyq áleýetin nyǵaıtý úshin quqyqtyq jáne qarjylyq negiz jasaıdy jáne halyqaralyq tájirıbeni eskere otyryp, IT mamandaryn yntalandyrý júıesin aıtarlyqtaı ózgertedi.
IT mamandaryn yntalandyrýdyń jańa júıesi tek eńbek ótiline ǵana emes, sonymen qatar qyzmetkerlerdiń kásibı quzyrettiligi men halyqaralyq sertıfıkattaýyna da baılanysty bolady. Bul elektrondy úkimetti damytý jáne eldegi aqparattyq qaýipsizdikti jaqsartý úshin negiz bolady.
Jalaqynyń ósýi tolyǵymen memlekettik bıýdjetten qarjylandyrylatyny atalyp ótti.
Aıta keteıik, buǵan deıin Tájikstannyń Qazaqstannan 1,3 mln tonnaǵa deıin astyq ımporttaýdy kózdep otqanyn jazǵan edik.
