Tájikstanda II Dúnıejúzilik soǵysynyń segiz ardageri qaldy
ASTANA. KAZINFORM — Jeńis kúni qarsańynda Tájikstanda Ekinshi dúnıejúzilik soǵysynyń bar bolǵany segiz ardageri ǵana qaldy. Bul týraly Kazinform agenttiginiń Dýshanbedegi menshikti tilshisi habarlady.
Tájikstannyń Soǵys jáne eńbek ardagerleri keńesiniń málimetinshe, qazirgi ýaqytta respýblıkada 8 ardager ómir súrip jatyr. Bir jyl buryn elde 17 ardager bolǵan.
Merekege sanaýly kún qalǵanda, 30 sáýirde Hatlon oblysynyń turǵyny, 100 jastaǵy ardager Mırzo Gafýrov qaıtys boldy.
Jyl saıyn Jeńis kúnine oraı ardagerlerdi áleýmettik qoldaý sharalary kúsheıtiledi.
2026 jyly Tájikstan prezıdenti Emomalı Rahmonnyń sheshimimen árbir ardagerge 50 myń somonı kóleminde tólem beriledi.
Soǵys jyldary Tájikstannan 300 myń adam maıdanǵa shaqyrylyp, olardyń ár úshinshisi elge oralmaǵan. Sondaı-aq 45 myń eńbekker tyldaǵy ónerkásip kásiporyndaryna jiberilgen, bul sol kezdegi respýblıka halqynyń úshten birin quraǵan. 55 myń tájikstandyq jaýynger ordender men medaldarmen marapattalyp, 54 adamǵa Keńes Odaǵynyń Batyry ataǵy berilgen.
Sonymen qatar 29 evakýatsııalyq gospıtal ashylyp, onda dárigerler 50 myń jaraly soldatty emdep, aıaqqa turǵyzǵan.
