Tájikstanda ejelgi Mehrgon egin merekesi toılanyp jatyr
ASTANA. KAZINFORM — Dýshanbedegi Fırdoýsı atyndaǵy saıabaqta ejelgi egin merekesi ári jerdiń molshylyǵyna alǵys aıtý meıramy — Mehrgonǵa arnalǵan saltanatty sharalar ótip jatyr. Bul týraly oqıǵa ornynan Kazinform agenttiginiń Dýshanbedegi menshikti tilshisi habarlady.
Mehrgonnyń tarıhy myńdaǵan jyldardan bastaý alady. Bul mereke egin jınaý jumystary aıaqtalyp, jerdiń bergen syıyna alǵys aıtylatyn kezeńde toılanǵan.
Merekeniń ótetin orny da sımvoldyq mánge ıe: saıabaq «Shahname» dastanynyń avtory, uly aqyn Fırdoýsıdiń esimimen atalady. Bul shyǵarmada Mehrgon merekesi de jyrlanǵan. Qazirgi Tájikstanda da ejelgi meıram keń kólemde, kóterińki kóńil kúımen atap ótiledi.
Merekelik alańnyń ortasyna gúlder men jemisterden jasalǵan, «Ҷashnı Meҳrgon» — «Mehrgon merekesi» degen jazýy bar alyp kompozıtsııa ornatylǵan. Qala turǵyndary men elorda qonaqtary kúni boıy onyń janynda sýretke tústi. Qonaqtardy jolaqty shapan kıip, beline ashyq tústi oramal baılaǵan ártister, sondaı-aq altyn tústi kıim men táj kıgen «Mehrgon shahy» beınesindegi ónerpazdar qarsy aldy.
Eldiń ár óńiri óz kórmesin ázirlegen. Tájikstannyń negizgi agrarlyq aımaqtarynyń biri sanalatyn Hatlon oblysy qonaqtardy ystyq kúlshe nan men qabattalǵan fatır, sambýsa, qara jáne aq júzim, anar, aıva, shabdaly, keptirilgen jemister men táttiler qoıylǵan uzyn dastarhanmen qarsy aldy.
Dastarhannyń aınalasyna tájik halqynyń dástúrli, ózine tán órnegi bar atlas jáne adras matalarynan tigilgen kóılek kıgen qyzdar jınaldy.
Kókónis ónimi de mol bolǵan. Aǵash arbanyń ishine qyryqqabat, baıaldy, tátti burysh, shalǵam, qyzylsha, asqabaq pen naǵyz tájik palaýyn daıyndaýǵa qajetti sary sábiz taý bolyp úıilgen.
Merekeniń sharyqtaý shegi teatrlandyrylǵan baǵdarlama boldy. Folklorlyq ansamblderdiń ártisteri egin jınaýǵa arnalǵan bılerdi oryndady. Qoldaryna qurma men anar salynǵan sebet ustaǵan qyzdar, jolaqty shapan kıgen jigitter dıqandardyń turmysynan kórinister kórsetti.
Ónerpazdardyń óner kórsetýine asqabaq, qarbyz jáne qaýynnan qoldan jasalǵan taýlar kórik berdi.
Qazirgi Tájikstanda bul mereke prezıdent Emomalı Rahmonnyń bastamasymen 2009 jyly qaıta jańǵyrtylyp, 2017 jyly materıaldyq emes mádenı muranyń ulttyq tizimine engizildi.
Naýryz ben Sada merekelerimen qatar, Mehrgon parsy tildes halyqtardyń ejelgi basty meıramdarynyń biri sanalady.
Eske salaıyq, buǵan deıin Tájikstan týrızmdi damytýǵa 29 mln dollardan astam qarjy bóletinin habarlaǵan edik.
