Tájikstanda ejelgi qala tabyldy
DÝShANBE. KAZINFORM – Tájikstannyń Hatlon oblysynda arheologtar ejelgi qala ornyn anyqtady. Qazba barysynda qundy tarıhı jádigerler tabylǵan, dep habarlaıdy agenttiktiń tilshisi.
Tájikstan Respýblıkasynyń tarıhı-mádenı muralardy qorǵaý agenttiginiń málimetinshe, tabylǵan Andıcharoǵ eldi mekeni kóne Hýttal aımaǵynyń bir bóligi bolyp sanalady. Bul ortaǵasyrlyq knıazdik bizdiń zamanymyzdyń VII-XVI ǵasyrlarynda qazirgi Tájikstan aýmaǵynda gúldengen.
– Eldi mekenniń ortalyq alańy shamamen 14 gektardy qamtıdy. Qazba jumystary kezinde 100-den astam arheologııalyq artefakt tabyldy. Olardyń qatarynda kóne tıyndar, keramıka, aǵash oıý jáne ustalyq buıymdar bar. Sondaı-aq bul aýmaqta eginshilik izderi — qol jáne sý dıirmenderi anyqtaldy, – dedi agenttik dırektory Sheralı Hodjazoda.
Buǵan deıin reseılik paleontologtar Tájikstan aýmaǵynan úırek tumsyqty dınozavrdyń bas súıeginiń synyǵyn tapqany habarlanǵan bolatyn.