Tájikstanda ekonomıkalyq belsendi halyq sany 3 mıllıonnan asty
ASTANA. KAZINFORM — 2025 jyldyń qorytyndysy boıynsha Tájikstan ekonomıkasynda jumyspen qamtylǵan halyq sany 3 mıllıonnan asty, dep habarlaıdy Dýshanbedegi Kazinform agenttiginiń menshikti tilshisi.
Tájikstan Respýblıkasynyń Statıstıka agenttiginiń derekterine sáıkes, 15-75 jas aralyǵyndaǵy jumys kúshiniń sany 3 018 773 adamdy qurady. Onyń ishinde 1 950 415 adam (64,6%) — erler, al 1 068 358 adam (35,4%) — áıelder.
Óńirler boıynsha ekonomıkalyq belsendi halyqtyń eń kóp sany Hatlon oblysyna tıesili — 1 mıllıonnan astam adam. Odan keıin Soǵdy oblysy — 1 077 647 adam, respýblıkalyq baǵynystaǵy aýdandar — 528 489 adam, Dýshanbe qalasy — 320 835 adam jáne Taýly-Badahshan avtonomııalyq oblysy — 90 724 adam.
Turǵylyqty jeri boıynsha jumys kúshiniń basym bóligi aýyldyq jerlerde turady. Zertteý nátıjesine sáıkes, 2 152 231 adam aýyldyq jerde, al 866 542 adam qalada turady.
Jas ereksheligi boıynsha eń kóp topty 30-34 jastaǵy azamattar quraıdy. Olardyń sany — 413 717 adam. Odan keıin 25-29 jastaǵylar — 383 106 adam jáne 35-39 jastaǵylar — 377 378 adam.
Bilim deńgeıi boıynsha eldegi jumys kúshiniń jartysynan astamy, ıaǵnı 1 604 641 adam tolyq orta bilim alǵan. 576 485 adamnyń joǵary bilimi bar, 479 886 adam negizgi jalpy bilim alǵan, al 195 094 adamnyń orta kásiptik bilimi bar.
Buǵan deıin Tájikstanda 29 jasqa deıingi jastardyń tórtten birinen astamy jumys istemeıtini, oqymaıtyny jáne eńbek mamandyǵy joq ekeni habarlanǵan.
Sondaı-aq, 2026 jyldyń birinshi jartyjyldyǵynda Tájikstannyń jalpy ishki ónimi (JІÓ) 8,8 mlrd AQSh dollaryna jetip, ekonomıkanyń ósý qarqyny 8,2%-dy quraǵany belgili boldy.
