Tájikstanda altyn quımalaryn satatyn bankomattar ornatylady

ASTANA. KAZINFORM — Tadjıkıstan Ulttyq banki altyn quımalaryn satyp alý jáne satý boıynsha arnaıy bankomattar ornatý jobasyn iske qospaq. Bul týraly qarjy retteýshisiniń basshysy Fırdavs Tolıbzoda baspasóz máslıhatynda málimdedi, dep habarlaıdy Kazinform agenttiginiń menshikti tilshisi.

Onyń aıtýynsha, arnaıy qurylǵylar arqyly azamattar bankke barmaı-aq, bankomattan qajetti mólsherdegi altyn quımalaryn tikeleı satyp ala alady.

Fırdavs Tolıbzoda bul bastama Emomalı Rahmon tapsyrmasyna sáıkes júzege asyrylyp jatqanyn atap ótti. Jobanyń maqsaty – halyqtyń altyn quımalaryna qoljetimdiligin jeńildetý.

Klıentter altyn quımasynyń qunyn bank kartasy arqyly tólep, satyp alǵan ónimin birden bankomattan ala alady. Sondaı-aq keri satyp alý (qaıta ótkizý) múmkindigi de qarastyrylǵan.

Ulttyq bank basshysynyń dereginshe, 2025 jyly elde jalpy salmaǵy shamamen 200 keli altyn quımasy satylyp, onyń jalpy quny 23,7 mıllıon AQSh dollaryn quraǵan.

Aıta keteıik, buǵan deıin Tájikstanda qolma-qol aqshasyz operatsııalar sany 47% jetkenin jazdyq.