Tájikstanda alǵash ret mýmııalanǵan máıitter tabyldy

DÝShANBE. KAZINFORM – Tájikstandyq arheolog 25-ten astam jerlengen máıitterdiń qańqasyn tapty, onyń úsheýi mýmııalanǵan, dep jazady Asia-plus.

Iskodar kentinde 25-ten astam qańqa, onyń ishinde úsh mýmııalanǵan dene tabylǵan. Mundaı jańalyq Tájikstan aýmaǵynda alǵash ret jasalyp otyr jáne mundaı mýmııalar buryn tek Qyrǵyzstan men Qytaıda ǵana tabylǵan.

Aını aýdany Iskodar aýylynyń turǵyny Tájikstannyń Ulttyq mýzeıine Sary-Basty zıratynyń aýmaǵynda kóne qulpytas bar ekenin aıtqan. Murajaı dırektory bul jańalyqty úlken yqylaspen qabyldap, Mádenıet mınıstrliginen ǵylymı-zertteý jumystaryn júrgizýge ruqsat alyp, aýdanǵa maman jibergen.

– Men kelgen kezde ishke kirip, barlyq súıekterdi qazyp, zerttedim jáne olardyń arasynan kenetten úsh mýmııalanǵan deneni taptym, olardyń biri óte jaqsy saqtalǵan, – deıdi Ulttyq mýzeıdiń arheologııa jáne nýmızmatıka bóliminiń mamany Mýhsın Bobomýlloev.

Osyǵan uqsas mýmııalanǵan máıitter 20-ǵasyrdyń basynda Qashqardaǵy (Qytaı) Tarım oıpatynan tabyldy, sonymen qatar 1956 jyly Batken oblysynyń Qaramyq aýdanynda (Qyrǵyzstan) áıeldiń mýmııasy tabyldy. Ol 2017 jyly qaıta jerlendi.

– Bul sırek kezdesetin jaǵdaılar, biraq mundaı mýmııalar ǵylymı antropologtarǵa kóp aqparat beredi. Óıtkeni olardan DNQ taldaýyn jáne basqa da mańyzdy synaqtardy alýǵa bolady. Siz adamnyń jasyn, jynysyn, ultyn, adamnyń nemen aýyrǵanyn, ne jegenin jáne neden qaıtys bolǵanyn naqtylaı alasyz. Ǵalymdar onyń syrtqy kelbetin qaıta jasaı alady, sol kezdegi adamdar qandaı bolǵanyn kórsetetin portretti jasaı alady, bul óte mańyzdy, – dep atap ótti arheolog.

Eske salsaq, buǵan deıin Qytaıda álemdegi eń iri altyn keni tabylǵanyn jazǵan edik.