Tájikstanda alǵash ret ekologııalyq kodeks qabyldandy
ASTANA. KAZINFORM — Tájikstan prezıdenti respýblıkanyń tuńǵysh ekologııalyq kodeksine qol qoıdy, dep habarlaıdy Kazinform Dýshanbedegi menshikti tilshisi.
Buryn qoldanysta bolǵan ekologııa salasyndaǵy 17 zań osy qujatqa biriktirildi.
Kodekste qorshaǵan ortany qorǵaý jáne resýrstardy basqarý erejeleri aıqyndaldy, «lastaǵan tóleıdi» qaǵıdaty bekitildi jáne qaldyqtardy basqarý, qorshaǵan ortany tsıfrlyq baqylaý, klımattyń ózgerýine beıimdelý jáne azamattardyń ekologııalyq aqparatqa qol jetkizýi boıynsha jańa talaptar engizildi.
Qabyldanǵan erejelerge sáıkes, arnaıy ruqsaty joq, qorshaǵan ortany lastaıtyn kásiporyndarǵa bes ese kóp aıyppul salynady. Mundaı shyǵaryndylar men qaldyqtar normadan tys bolyp sanalady.
Sonymen qatar, tólem lastaýshy kásiporyndardy jaýapkershilikten bosatpaıdy, olar lastaý saldaryn joıýǵa jáne qorshaǵan ortaǵa keltirilgen zalaldy óteýge mindetteledi.
Qujatta qaldyqtardy joıý erejeleri qataıtylǵan. Plastmassalardy, PET qaptamalaryn, batareıalardy, synapty shamdardy, shynyny, metall synyqtaryn, paıdalanylǵan shınalardy, eski kólikterdi jáne qurylys qaldyqtaryn qoqys polıgonyna tastaýǵa tyıym salynady. Medıtsınalyq, bıologııalyq jáne elektrondy qaldyqtar úshin bólek erejeler belgilendi. Jergilikti bılik organdary qaǵaz, toqyma buıymdary, tamaq qaldyqtary jáne metall sekildi qaıta óńdeletin qaldyqtardyń bólek jınalýyn qamtamasyz etýi tıis.
Kodekste «tsıfrlyq ekologııa» uǵymy engizilip, biryńǵaı memlekettik ekologııalyq monıtorıng júıesin jáne aqparattyq resýrstardy qurý kózdelgen. Jyl saıyn ulttyq ekologııalyq esep jarııalanyp otyrady.
Buǵan deıin Tájikstan bıligi el astanasyndaǵy kásiporyndardy jappaı kún energııasyna kóshirýdi bastaǵanyn habarlaǵan edik.
