Tájikstanda 30 myń kórermenge arnalǵan Ulttyq stadıon ashyldy
ASTANA. KAZINFORM — Tájikstan táýelsizdiginiń 35 jyldyǵy qarsańynda el astanasynda jańa Ulttyq stadıon paıdalanýǵa berildi. Ashylý rásimine Tájikstan prezıdenti Emomalı Rahmon men Dýshanbe qalasynyń tóraǵasy Rýstamı Emomalı qatysty, dep habarlaıdy Kazinform agenttiginiń menshikti tilshisi.
Stadıon 9,5 gektar aýmaqta salynǵan jáne 30 myńnan astam kórermenge arnalǵan. Sport kesheni eki deńgeıden turady: tómengi deńgeıde 12 myńnan astam, joǵarǵy deńgeıde 18 myń oryn qarastyrylǵan.
Ǵımarattyń jalpy aýmaǵy 42 myń sharshy metrden asady, al qurylys aýmaǵy — 27 myń sharshy metr. Stadıon bes qabattan jáne jertóle qabatynan turady. Onyń bıiktigi 33 metrge jetedi.
Stadıonnyń ortasynda aýmaǵy 7 140 sharshy metr bolatyn zamanaýı fýtbol alańy ornalasqan. Alańnyń kólemi — 105×68 metr.
Bul FIFA-nyń halyqaralyq matchtar men álem chempıonaty oıyndaryn ótkizýge qoıylatyn talaptaryna sáıkes keledi.
Emomalı Rahmon Ulttyq stadıonnyń ashylýyn el halqyna jasalǵan laıyq syı dep atady.
Eske salaıyq, buǵan deıin Tájikstandaǵy Rogýn sý elektr stantsııasy taǵy 30 metrge kóteriletinin habarlaǵanbyz.
