Tájikstan–Aýǵanstan shekarasynda 1,5 tonnadan astam esirtki tárkilendi
ASTANA. KAZINFORM — 2026 jyldyń alǵashqy jartysynda Tájikstan men Aýǵanstan shekarasynda 1,5 tonnadan astam esirtki tárkilendi. Bul týraly Tájikstan Prezıdenti janyndaǵy Esirtkini baqylaý agenttiginiń dırektory Zafar Samad eseptik baspasóz máslıhatynda málimdedi, dep habarlaıdy Kazinform agenttiginiń Dýshanbedegi menshikti tilshisi.
Esirtkige qarsy vedomstvo basshysynyń aıtýynsha, bıylǵy alty aıda Aýǵanstanmen shekarada Tájikstannyń kúshtik qurylymdary men aýǵandyq kontrabandashylar arasynda jeti qarýly qaqtyǵys bolǵan. Sonyń saldarynan Aýǵanstannyń 17 azamaty qaza tapqan.
– Jalpy kólemi 1 tonna 513 keli esirtki tárkilendi. Zańsyz aınalymnan alynǵan tyıym salynǵan zattardyń kólemi ótken jylmen salystyrǵanda 179 kelige azaıdy. 2025 jyldyń osy kezeńinde bul kórsetkish 1,6 tonnany quraǵan bolatyn, – dedi Zafar Samad.
Ol Tájikstannyń «Talıban» qozǵalysynyń bıligimen esirtkiniń zańsyz aınalymyna qarsy kúres salasynda yntymaqtastyq ornatpaǵanyn aıtty.
Sonymen qatar kelip túsetin aqparattardy taldaý Aýǵanstanda esirtki ósirý, óńdeý jáne óndirý kólemi, onyń ishinde sıntetıkalyq psıhotroptyq zattardy shyǵarý kólemi artyp kele jatqanyn kórsetip otyrǵanyn atap ótti.
Eske salaıyq, Aýǵanstannan Ózbekstanǵa dronmen esirtki ótkizbek bolǵandardyń áreketi áshkerelengen edi.
