Tájikstan ulttyq banki Bazel konsýltatıvtik tobynyń quramyna endi

ASTANA. KAZINFORM — Tájikstan ulttyq banki Bazel konsýltatıvtik tobynyń (Basel Consultative Group, BCG) quramyna kirdi. Bul týraly retteýshi organnyń baspasóz qyzmeti málimdedi.

Tájikstan Ulttyq banki Bazel konsýltatıvtik tobynyń quramyna endi
Foto: bis.org

Mundaı sheshim Bazel banktik qadaǵalaý komıtetiniń hatshylyǵymen birneshe kezeńnen turatyn kelissózderden keıin qabyldandy.

Ulttyq bank bul qadamdy bank qyzmetin retteý jáne qadaǵalaý salasyndaǵy halyqaralyq yntymaqtastyqty nyǵaıtý, sondaı-aq álemdik ozyq tájirıbe men standarttardy engizý maqsatymen túsindirdi. Endi Tájikstan Bazel komıtetiniń jańa bastamalaryn talqylaýǵa qatysyp, olardy ázirleý barysynda óz saraptamalyq ustanymyn bildire alady.

Retteýshi organnyń málimetinshe, top jumysyna qatysý ulttyq bank júıesindegi retteý men qadaǵalaý tetikterin jetildirýge jáne bank sektorynyń turaqtylyǵyn nyǵaıtýǵa yqpal etedi.

Bazel konsýltatıvtik toby Bazel komıteti men onyń quramyna kirmeıtin elderdiń retteýshi jáne qadaǵalaý organdary arasyndaǵy baılanysty qamtamasyz etedi. Top aıasynda bank qyzmetin retteýdiń ózekti máseleleri boıynsha kásibı pikir almasý ótedi. Sonymen qatar qatysýshylar Bazel komıtetiniń bastamalary men talaptaryn ázirleýdiń bastapqy kezeńinde talqylaıdy.

BCG jumysyna ortalyq bankterdiń, bank qyzmetin retteý jáne qadaǵalaý organdarynyń, halyqaralyq uıymdar men qadaǵalaý organdarynyń óńirlik birlestikteriniń ókilderi qatysady.

Eske salaıyq, buǵan deıin Tájikstanda bank kartalaryn bógde adamdarǵa bergeni úshin ákimshilik jaýapkershilik engiziletinin jazǵanbyz.