Tájikstan úkimeti ýtılalym mólsherin ózgertýdi josparlap otyr

DÝShANBE. KAZINFORM — Tájikstan úkimeti ýtılalym mólsherin ózgertý bastamasyn talqylap jatyr, dep habarlaıdy Kazinform agenttiginiń tilshisi.

Tájikstan Keden qyzmetiniń basshysy Hýrshed Karımzodanyń málimetinshe, ýtılalymnyń jańa qunyn belgileý máselesi ázirge zerdelenip jatyr. Sondaı-aq, atalǵan tólemdi kólikti elge kirgizgen ýaqytta alý tártibi engizilmek. Buǵan deıin tájikstandyq júrgizýshiler temir tulpardy tirkeýge qoıǵan kezde ǵana ýtılalymdy óteýi tıis bolatyn.

— Qabyldanǵan shekteý sharalaryna qaramastan, elge eski kólikterdi, túrli dárejede jóndeýden ótken temir tulparlardy ákelý toqtamaı tur, — dedi Hýrshed Karımzoda.

Vedomstvo basshysy atap ótkendeı, endi ýtılalymdy jınaý quzyreti Keden qyzmetine beriledi. Qazirgi ýaqytta bul mindetti Memlekettik avtokólik ınspektsııasy atqaryp keledi.

Aıta keteıik, Tájikstanda ýtılalym 2024 jyldyń basynda engizilgen. Búginde onyń quny 360 somonıden bastalyp (shamamen $33), 2880 somonıge ($264) deıin jetedi.

Qosa ketsek, buǵan deıin Ózbekstan bıligi Tájikstanmen odaqtastyq qarym-qatynas ornatý kelisimin maquldaǵanyn jazyp edik.

Munymen birge, Qazaqstan Tájikstannan elektr energııasyn ımporttaýǵa nıetti.