Tájikstan týrızmdi damytýǵa 29 mln dollardan astam qarjy bóledi
ASTANA.KAZINFORM — Tájikstan 2030 jylǵa deıin týrıstik salany damytýǵa 29,5 mln dollar baǵyttaıdy. Bul týraly Dýshanbedegi Kazinform agenttiginiń menshikti tilshisi habarlady.
Tıisti sheshimdi Tájikstan úkimeti 2026 jylǵy 27 shildede qabyldady. Qujatta 2027–2030 jyldary Týrızmdi damytýdyń 2030 jylǵa deıingi strategııasyn iske asyrý jónindegi is-sharalar jospary bekitilgen.
Jańa strategııa aıasynda 6 negizgi baǵyt boıynsha 37 is-shara júzege asyrylady. Olardy qarjylandyrýǵa jalpy 273,4 mln somonı (29,5 mln dollar) qarastyrylǵan. Onyń ishinde 60,8 mln somonı memlekettik bıýdjetten, 68,9 mln somonı damý seriktesterinen, al 143,6 mln somonı jeke sektordan bólinedi.
Jospar týrıstik salanyń barlyq negizgi baǵyttaryn qamtıdy. Atap aıtqanda, zamanaýı ınfraqurylym qalyptastyrý, týrısterdiń qaýipsizdigin qamtamasyz etý, saladaǵy kadrlyq áleýetti kúsheıtý, «E-mehmon» júıesin engizý jáne eldiń týrıstik múmkindikterin halyqaralyq kórmelerde ilgeriletý kózdelgen.
Tájikstannyń Týrızmdi damytý komıtetine jyl saıyn 1 naýryzǵa deıin jospardyń oryndalý barysy týraly úkimetke esep berý tapsyryldy.
Buǵan deıin Tájikstanda týrızmdi damytý qory qurylǵany habarlanǵan edi. Elde týrıster úshin jańa tólem engiziledi.
