Tájikstan táýelsizdiginiń 35 jyldyǵyna oraı áskerı sherý ótkizdi
ASTANA. KAZINFORM — Dýshanbedegi Táýelsizdik alańynda Tájikstan Respýblıkasy memlekettik táýelsizdiginiń 35 jyldyǵyna oraı áskerı sherý ótti, dep habarlaıdy Kazinform-nyń menshikti tilshisi oqıǵa ornynan.
Dýshanbe garnızonynyń bólimsheleri men quramalarynyń áskerı sherýine qorǵanys mınıstrligi bólimsheleri men kúsh qurylymdarynyń sarbazdary, quqyq qorǵaý organdarynyń qyzmetkerleri, áıel áskerı qyzmetshiler, kúshtik qurylymdardyń ardagerleri, ınternatsıonalıst jaýyngerler — jalpy 27 myńnan astam áskerı qatysty.
Paradty Tájikstan Respýblıkasynyń prezıdenti, qarýly kúshterdiń joǵarǵy bas qolbasshysy, armııa generaly Emomalı Rahmon ashty. Respýblıka basshysy áskerı qyzmetshiler men quqyq qorǵaý organdary qyzmetkerleriniń eldiń konstıtýtsııalyq qurylysyn, memlekettik qaýipsizdigin, halyqtyń beıbitshiligi men zań ústemdigin qamtamasyz etýdegi ornyn aıryqsha tilge tıek etti.
— Memlekettik táýelsizdigimizdiń 35 jyl tolyp otyrǵan tarıhy memleket qaýipsizdigi men turaqtylyǵyn, Tájikstan halqynyń beıbit ómirin senimdi qalqan bolyp qorǵap kele jatqan qarýly kúshterimizdiń sarbazdary men áskerleri, qorǵaý organdarynyń qyzmetkerleri el azamattarynyń qurmeti men maqtanyshyna laıyq ekenin kórsetti, — dedi Emomalı Rahmon.
Buǵan deıin Tájikstan táýelsizdiginiń 35 jyldyǵy qarsańynda el astanasynda jańa Ulttyq stadıon paıdalanýǵa berilgenin habarlaǵan edik.
